भाय् – लिपि ल्यंकेत ल्यायम्ह पुस्ता जिम्मेवार जुइमाः

येँ – ३ नं प्रदेशया मुख्यमन्त्री डोरमणि पौडेलं मांभाय्, लिपि व सांस्कृतिक धरोहरयात ल्यंका तयेत व उकियात जीवन्त याना तयेत ल्याय्म्ह पुस्ता जिम्मेवार जुइमाः धयादीगु दु । प्रदेश नं. ३ सामाजिक विकास मन्त्रालय व भाषा आयोगं मंकाःकथं ३ नं प्रदेशया अस्थायी राजधानी हेटौंडाय् ग्वसाः ग्वःगु प्रदेशस्तरीय भाषा संगोष्ठिया उलेज्या यासें वय्कलं उगु खँ धयादीगु खः ।

मुख्यमन्त्री पौडेलं दुर्गमा थासय् च्वनाच्वंपिं थीथी जाति व समुदायया लोप जुया वनेत्यंगु भाषा, कला, लिपि, संस्कृतिया धरोहरयात न्ह्याबलें जीवन्त याना तयेमाः धासें उकिया निंतिं ल्याय्म्ह पुस्ता जिम्मेवार जुइमाः धयादीगु खः । थीथी जातजाति व समुदायया मातृभाषा, लिपि, सांस्कृतिक धरोहरयात जीवन्त याना तयेगु निंतिं ल्याय्म्ह पुस्ता जिम्मेवार जुइमाःगु व उकिया निंतिं भाषा आयोगं संवैधानिक भूमिका म्हिते फयेकेमाःगु खँय् नं वय्कलं बः बियादीगु दु ।

प्रदेश नं. ३या सामजिक विकासमन्त्री युवराज दुलालं थीथी भाषाभाषीतय् लिपि व सांस्कृतिक धरोहरयात दीर्घकालीन रुपं संरक्षण व संवद्र्धन यायेगु ज्या सरकारीस्तरं जुइगु कुतलं जक सम्भव जुइमखु धासें भाषा आयोग, प्रज्ञा प्रतिष्ठान थेंज्याःगु प्राज्ञिक निकायं उच्च शिक्षाय् अध्यापनय् ग्वाहालि यायेमाःगु खँय् बः बियादिल ।

ज्याझ्वलय् भाषा आयोगया अध्यक्ष डा. लवदेव अवस्थीं आदिवासी जनजाति, लोपोन्मुख चेपाङ, सीमान्तकृत, दलित समुदायया भाषा, लिपि, सांस्कृतिक धरोहरयात संरक्षणया निंतिं सुझाव संकलन यानाः व्यवस्थापन यायेगु जुइ धयादिल ।