हुलाप्याखं कासाय् २३ म्ह कासामि

यल (नेपालभाषा टाइम्स)- यल महानगरपालिका १६ वडा कलाकार समितिं न्हूदँया लसताय् ग्वसाः ग्वःगु हुलाप्याखं कासाय् २२ म्हेसिनं ब्वति काःगु दु । ब्वति काःपिं कासामिपिंसं थौं शनिवाः रत्नाकर महाविहारलय् जुइगु अडिशनय् ताःलाकेमाःगु खँसमितिया संयोजक सुरजवीर बज्राचार्यं कनादीगु दु । थुगु कासाया बिजं कासा वइगु कार्तिक १६ गते शुक्रवाः यल लाय्कूया कात्तिदबुलिइ सनिलया ४ बजे न्ह्याइ ।

थुगु कासाय् न्हाप, ल्यू, लियांल्यू व हःपा सिरपाः त्याकादीपिन्त शिल्ड, दसिपौलिसे छसीकथं ५० हजार, ३० हजार, १५ हजार व ५ हजार नगद सिरपाः देछायेगु लिसें वरिष्ठ लोकगायक रत्न बेहोशी बज्राचार्ययात “ललितरत्न” उपाधिं छाय्पियाः हनेगु ज्याझ्वः दुगु नं वज्राचार्यं कनादिल ।

थुगु कासाय् ब्वति कयादीपिं आयुशा तामाङ, आयोना लाखा, इभान धाख्वा, उत्पला बज्राचार्य, विमिशा डंगोल, विमला महर्जन मानन्धर, जस्मि श्रेष्ठ, नैरात्मा बज्राचार्य, प्रज्ञा महर्जन, निमा महर्जन, मेरिस्का बज्राचार्य, रेजिना बज्राचार्य व लसता बज्राचार्य, सजगता मानन्धर, सफू बज्राचार्य, स्मृति शाक्य, स्लेजा शाक्य, सुनिभा शाक्य, सुनैना बज्राचार्य, सुयंका बज्राचार्य, शायरा महर्जन, लकि महर्जन, लुजला शाक्य खः । कासाय् येँ, यल, ख्वप व धादिङया कासामिपिं दुथ्याः ।

यल मनपा १६ वडाया अध्यक्ष निर्मलरत्न शाक्यं कलाकार समिति स्वनेगु अवधारणा न्ह्यब्वयाः पत्रकार व कलाकार बज्राचार्यया संयोजकत्वय् ११ म्ह दुजः दुथ्याःगु समिति दयेकूगु खः ।