तःजिक क्वचाल किलाघः महोत्सव

येँ – नेपाल संवत् ११४० न्हूदँ क्यंगु लसताय् येँ महानगरपालिका १८ वडाया ग्वसालय् वंगु शनिवाः जूगु किलाघः महोत्सव भिंतुना सनिल तःजिक क्वचाल । महोत्सवया उलेज्या यानादिसें येँ महानगरपालिकाया मेयर विद्यासुन्दर शाक्यं यानादीगु खः । ज्याझ्वलय् नवासें वय्कलं महानगर क्षेत्र दुने दुगु मूर्त व अमूर्त धार्मिक, सांस्कृतिक, ऐतिहासिक सम्पदा येँया पर्यटन पूर्वाधारया निंतिं अतिकं महत्व दुगु खँ धयादिल ।

लिसें मेयर शाक्यं चालु आर्थिक दँयात येँ महानगरं सम्पदा संरक्षण, संवद्र्धन व पर्यटन प्रवद्र्धनया निंतिं पूर्वाधार वर्षया रुपय् कयागु नं जानकारी बियादिसें येँ मनपां थ्व हे कथं ज्या यानाच्वंगु दु धयादिल । मेयर शाक्यं धयादिल, ‘येँ महानगरया पर्यटन पूर्वाधारया निंतिं येँ मनपालिसें लिक्कसं च्वंगु मेमेगु नगरया वडाया सांस्कृतिक सम्पदायात नं प्रवद्र्धन यायेगु ल्याखं ज्या यानाच्वनागु दु ।’

महोत्सवय् थीथी नसाज्वलं लगायत स्थानीय मिसा पुचलं उत्पादन याःगु थीथीकथंया घरेलु उत्पादनया स्टलत नं नःगु खः । अथे हे महोत्सवया हे झ्वलय् जूगु भिंतुना सनिल सांस्कृतिक ज्याझ्वलय् नांजाःपिं म्येँ हालामिपिं जुजुकाजी रंजित, पवित्र कसाः, अनिल शाही, रत्नशोभा महर्जन, रिता महर्जन, अनिल शाही, प्रमोद पाण्डे, सुलिन्द्र शाक्य लगायतं म्येँ न्ह्यब्वयादीगु खःसा मेमेपिं कलाकारंपिंसं न सांगीतिक प्रस्तुति व हुलाप्याखं न्ह्यब्वयादीगु खः ।

उगु इलय् महोत्सवया हे लसताय् लाकाः येँ मनपा १८ वडापाखें वंगु दँया बजेटं निर्माण याःगु किलाघः त्वालय् च्वंगु पीगं द्यःया देगः, द्यःकुथि, नासः चुक, मलामि गुथि भवन व दाछि अप्पा तयाः दयेकूगु पःखाःया नं मेयर शाक्यं उलेज्या यानादीगु खः ।

सम्बन्धित बुखँ

LEAVE YOUR COMMENTS