कोरोना भाइरस : आः तक ४६७म्ह अस्पतालं डिस्चार्ज

येँ – नेपालय् आः तक ४ सय ६७म्ह मनूत कोरोनामुक्त जुया अस्पतालं डिस्चार्ज जूगु दु । वंगु नीप्यघौया दुन १ सय २म्ह मनूत कोरोनामुक्त जुया अस्पतालं डिस्चार्ज जूगु खः । डिस्चार्ज जूपिं मध्ये १ सय मिजंत व २म्ह मिसात खः ।

थौं धरानया बीपी कोइराला स्वास्थ्य विज्ञान प्रतिष्ठानं झापा १२म्ह, बाराया कैलाली अस्पतालं बाराया ३४म्ह व येँया बलम्बुइ च्वंगु कोभिड-१९ युनिफाड अस्पतालं महोत्तरीया १म्ह डिस्चार्ज जूगु दु । अथेहे बुटवलया कोरोना आइसोलेसन सेन्टरं रुपन्देही व कपिलवस्तुया २७म्ह, दाङया कोरोना विशेष अस्पतालं दाङ, बर्दिया, कपिलवस्तु व बाँकेया १०म्ह व गौरया नर्सिङ इन्सिच्युटपाखें रौतहटया १८म्ह डिस्चार्ज जूगु दु ।

प्रादेशिक रुपं प्रदेश नम्बर १य् ९१म्ह, प्रदेश २लय् १ सय ८६म्ह, बागमति प्रदेशय् ३२म्ह व गण्डकी प्रदेशय् ३म्ह डिस्चार्ज जूगु दु । अथेहे प्रदेश नम्बर ५य् ९म्ह, कर्णाली प्रदेशय् १३म्ह व सुदूरपश्चिम प्रदेशय् १३म्ह डिस्चार्ज जूगु दु ।