शैक्षिक सत्र निला थप यायेगु तयारी

येँ – सरकारं थुगुसीया शैक्षिक सत्र निला थप यायेगु तयारी याःगु दु । कोरोना भाइरस महामारीया कारणं थ्वहे माघंनिसें जक स्कुल चायेकेगु शुरु जूगुलिं पाठ्यक्रम हे क्वचायेके फइगु अवस्था मदु धासें शैक्षिक सत्र निला अप्वयेकाः जेठ तक थ्यंकेगु तयारी याःगु खः ।

शिक्षा तथा विज्ञान प्रविधि मन्त्रालयया सचिव गोपीनाथ मैनालीं यक्व हे सरोकारवालातय्सं थुगुसी शैक्षिक सत्र ताःहाकयेकेमाःगु सुझाव वःकथं हे थःपिंसं वइगु दँया जेठ तक शैक्षिक सत्र ताःहाकयेकेगु तयारी यानागु खँ धयादीगु दु । वय्कलं सरोकारवालातय् सुझाव कथं हे निर्णय यायेत मन्त्रालयं तयारी यानाच्वंगु खँ धासें धयादीगु दु, ‘शैक्षिक सत्र सम्बन्धी जुयाच्वंगु अन्योल याकनं हे चीकेगु जुइ ।’

वय्कलं शैक्षिक सत्र ताःहाकः यात धाःसा थ्व फुक्क हे स्कुलय् लागू जुइगु खँ धयादीगु दु । ‘वैकल्पिक माध्यमं न्हापांनिसें ब्वंकाच्वंगु स्कूल जुइमा वा माघय् जक चायेकूगु स्कुल जुइमा, फुक्क स्कुलय् थ्व निर्णय लागू जुइ’ वय्कलं धयादीगु दु ।

सामान्यतः चैतय् हे शैक्षिक सत्र क्वचाइगु जुयाच्वंगु खः । आः निला थप यायेवं मेगु सत्र असारं जक सुरु जुइगु जुइ । अथे जुइबलय् मेगु सत्र नं झिलाया जक जूवनीगु जुइ । उकिं शिक्षाविद्तय्सं आः निर्णय यायेबलय् थुगुसी छक्वः जक शैक्षिक सत्र ताःहाकः यायेगु खःकि लिपा थ्यंकं जेठ हे सत्र क्वचायेकेगु खः उकिया निर्णय नं आः हे यायेमाःगु सुझाव बिउगु दु ।

कोरोना भाइरसया महामारीया कारणं थगुने चैतंनिसें हे स्कुल बन्द जूगु खःसा असारय् वयाः जक सरकारं वैकल्पिक शिक्षा कार्यक्रम व असोजं विद्यार्थी सिकाइ सहजीकरण निर्देशिका हयाः वैकल्पिक माध्यमं ब्वंकेगु कुतः याःगु खः । तर थ्व माध्यमं यक्व धयाथें विद्यार्थीत ब्वनेत सक्षम मजुल । आः माघं जक भौतिक रुपं उपस्थित जुयाः कक्षा संचालन जूबलय् चैत तकया दुने कोर्स क्वचायेकाः अन्तिम परीक्षा काये फइगु अवस्था मदुगुलिं शैक्षिक सत्र हे ताःहाकयेकेमाःगु माग जूगु खः ।

शिक्षा नियमावली कथं दँय् १९२ न्हु पढाइ जुइमाःगु व्यवस्था दु । सरकारं शैक्षिक सत्र तब्याकेगु तयारी याःसां अभिभावकपिंसं धाःसा क्वय्या कक्षाया चैतय् हे क्वचायेकूसां जिउगु खँ धयाच्वंगु दु । कक्षा १ निसें ८ तकया कक्षा नियमित कथं चैतय् हे क्वचायेकूसा जिउगु अभिभावकतय् धापू नं वयाच्वंगु दु । मेखे शिक्षाविदतय्सं नं शैक्षिक सत्र ताःहाकयेकेगु स्वयां मस्तय्सं सयेका काःगुया अवस्था गथे दु धकाः अध्ययन यानाः जक निर्णय यायेमाःगु खँ धाःगु दु ।

शिक्षाविद् सुसन आचार्यं बिबिसीलिसे खँ ल्हासें धयादीगु दु, ‘विद्यार्थीतय्सं निला थप यानाः सयेका काइ कि काइमखु धयागु महत्वपूर्ण खँ खः । उकिं विद्यालयतय्त हे थुलि सयेकेमाःगु छिमि विद्यार्थीतय्सं सयेका कायेधुंकूगु खःसा मेगु कक्षाय् छ्वःसां जिउ, मखुसा गुलि थप ई ब्वंकेमाः धकाः छिमिसं हे निर्णय या धकाः धायेमाः ।’

निजी स्कुलय् मस्त ब्वंकातःपिं अभिभावकपिंसं नं लकडाउन सुरु जुसां निसें हे अनलाइन कक्षा कयाच्वंपिं मस्तय्त शैक्षिक सत्र थप यायेम्वाःगु बिचाः तयाच्वंगु दु । ‘जिमि मस्त लकडाउन शुरु जुसांनिसें न्हि प्यघौ–न्याघौया अनलाइन कक्षा कयाच्वंगु दु, नियमित कथं परीक्षा नं बियाच्वंगु दु । उकिं चीधंगु कक्षायापिंत शैक्षिक सत्र थप यायेगु स्वयां मेगु कक्षाय् वनीबलय् भचा अप्वः रिभिजन याकेगु हे बांलाइ’ थः मस्तय्त निजी स्कुलय् ब्वंकाःतम्ह छम्ह अभिभावकं धाःगु दु ।

सम्बन्धित बुखँ

LEAVE YOUR COMMENTS