ने. सं. ११४६ बछलाथ्व तृतीया - अक्षय तृतीया, भिक्षु प्रज्ञानन्द महास्थविरया १२६ क्वःगु बुदिं

अन्ततः रवीन्द्र मिश्रं असली ख्वाः उला हल

येँ- गठन जूगु इलंनिसें हे सुंपाखें परिचालित धकाः शंका यानातःम्ह विवेकशील साझा पार्टीया नेता रवीन्द्र मिश्रं अन्ततः थःगु असली ख्वाःपाः उला हःगु दु । वय्कलं आः नकतिनि थःगु पार्टी दुने संघीयता खारेज यानाः धर्म निरपेक्षताया विषयय् जनमत संग्रह यायेमाः धइगु बिचाः प्रस्तुत यानादीगु दु । संघीयतां यानाः देय्न्यंकं भ्रष्टाचार न्यना वंगु, देय्या अखण्डता खतराय् लाःगु व थुकियात नेपाःया अर्थतन्त्रं फये फइ मखु धइगु तर्क तसें वय्कलं संघीयता खारेजीया माग न्ह्यःने हःगु खः ।

अथे हे नेपाः हिन्दूतय्गु बाहुल्यता दुगु देय् जूगु तर्क तसें धर्म निरपेक्षताया सवालय् जनमत संग्रह यानाः जक निर्णय यायेमाःगु तर्क नं तःगु दु । वय्कलं राजतन्त्रया वकालत याना मदीसां देय्या वर्तमान राजनीतिं यानाः गणतन्त्र खतराय् लाःगु बिचाः धाःसा सार्वजनिक यानादीगु दु ।

विवेकशील साझाया संयोजक मिलन पाण्डें धाःसा मिश्रया बिचाःलिसे पार्टीया छुं स्वापू मदुगु खँ धाःगु दु ।