मचा साहित्य च्वन्ह्याकेत सहलह गोष्ठि जुइगु

येँ(नेपालभाषा टाइम्स)÷ नेपालभाषा साहित्य ख्यलय् मचा साहित्यय् खने दयाच्वंगु अभावयात पूवंकेगु ल्याखं कन्हय् छगू सहलह गोष्ठि जू वनाच्वंगु दु । नेवाः देय् दबू येँ महानगर २३ वडा कचाया ग्वसालय् ‘नेपालभाषा मचा साहित्य च्वन्ह्याकेत सहलह गोष्ठि’ यायेत्यंगु खः ।
गोष्ठि ताःलाकेगु निंतिं बुधवाः छगू सहलह जूगु खः ।

गोष्ठिइ नांजाःम्ह साहित्यकार रमेशकाजी स्थापितं ‘नेपालभाषा मचा साहित्य म्हिगः, थौं व कन्हय्’ विषयय् ज्यापौ न्ह्यब्वयादी । सहलहय् नेवाः देय् दबूया नायः पवित्र वज्राचार्यं नेपालभाषा साहित्य विधाय् आपालं साहित्य श्रृजना जूसां मचा साहित्यया अभाव जुयाच्वंगु खँ कनादिल । वय्कलं नेपालभाषा जक मखसे खस भाषाय्तकं नांजाःम्ह मचा साहित्यकार शान्तदास मानन्धर मदयेधुंकाः वय्कःया अभावयात पूवंकेगु ल्याखं मचा साहित्य गोष्ठि यानाः वय्कः व मचा साहित्यया अभाव पूवंकेमाःगु खँय् बः बियादिल ।

गोष्ठिया आयोजना लिपा मचा साहित्यय् च्वसा न्ह्याकीपिं अप्वइगु विश्वास नं प्वंकादिसें देय् दबूया नायः वज्राचार्यं नेवाः देय् दबूया न्हूगु सांगठनिक संरचनालिप दकलय् अप्वः सक्रिय व ज्या जूगु येँ महानगर समिति व थ्व अन्तर्गतया थीथी वडा कचापाखें हे खः धासें दक्वं वडा कचापाखें छगू हे प्रकृतिया गतिविधि जुया वयाच्वंगुलिं २३ वडापाखें साहित्य ख्यःयात तिबः बीकथं ग्वसाः ग्वयेत्यंगु ज्या धाथें मेपिनिगु निंतिं नमूना जुइ जुइ धयादिल ।

विशेष पाहांकथं झायादीम्ह भाषा आयोगया दुजः माननीय सुरेश मानन्धरं येँ महानगरमध्ये २३ वडा छगू अज्याःगु वडा खः गन लिच्छवी, मल्लनिसें शाहकालय् तकं राजनीति, भाषा, साहित्य, पर्यटन आदि ख्यःया निंतिं उद्गम स्थल जूगु विचाः तयादिल । २३ वडाय् आपालं भाषा, साहित्य ह्यःमिपिं जन्म जूगु थासय् थः नं व हे वडाया छम्ह कायमचा जूगु ल्याखं गर्व ताः धयादिल ।

लिसें वय्कलं गोष्ठिया निंतिं जक गोष्ठि यायेगु मखसे गोष्ठि क्वचायेकाः सकसिनं थनिंनिसें जिं नं मचा साहित्यया निंतिं च्वसा न्ह्याके धइगु संकल्प याये फयेमाः धयादिल । थौंकन्हय्सं नेवाः भाय् ल्हायेगु त्वःता हयाच्वंगु धइगु खँय् छतका दां नं लगानी मयासे, सुयाकें त्यासा मकासे झीसं थः मस्तलिसें झीगु हे थःगु मांभासं खँल्हाबल्हा यायेमाः धयादिल । ब्वनेकुथिइ व पिने वनेधुंकाः न्ह्यागु हे भाय् ल्हाःसां दकलय् न्हापां छेँय् मांअबुं थःमस्तलिसे नेवाः भासं खँल्हाबल्हा यायेमाःगु खँय् बः बियादिसें थथे जुल धाःसा छम्ह नच्चाम्ह मचां म्होतिं नं न्यादँया उमेरय् न्यागू स्वयां अप्वः भाय् सयेकेत सक्षम जुइ धयादिल ।

देय् दबू येँ महानगर समितिया नायः शोभा महर्जन वज्राचार्यं नेवाःत छाय् लिउने लानाच्वन धइगु खँय् थःगु अनुभव न्यंकादिसें छुं नं ज्या यायेबलय् असफल जुल धाःसा उकियात त्वःतेगु मखसे उकिपाखें शिक्षा कयाः न्ह्याः वनेमाः धयादिल ।

नेवाः देय् दबू २३ वडा कचाया नायः आशाकाजी महर्जनया सभापतित्वय् जूगु सहलह मुँज्याय् देय् दबू राष्ट्रिय परिषद्या दुजः उदेन न्हूसाय्मि, महानगर समितिया सचिवालय दुजः ममता जोशी लिसें कचाया पदाधिकारीपिनिगु उपस्थिति
दुगु खः ।