कर्माचार्यं जुम्लाय् वनाः थःगु १८० क्वःगु हिदान यात

येँ (नेपालभाषा टाइम्स)- दकलय् अप्वः हिदान यानादीम्ह स्वयंसेवी रक्तदाता प्रेमसागर कर्माचार्यं कर्णाली प्रदेशया जुम्लाय् वनाः थःगु १८० क्वःगु हिदान यानादीगु दु । वय्कलं कर्णालीया स्वास्थ्य विज्ञान प्रतिष्ठान शिक्षण अस्पतालय् जुम्लाय् हिदान यानादीगु खः ।

हिदानया भावना सकसिकें दयेमाः धयागु सन्देश बीगु ल्याखं भाजु कर्माचार्यं देय्या थीथी जिल्लाय् वनाः हिदान यायेगु याना वयाच्वंगु खः । वय्कलं धयादीगु दु, ‘जिगु थ्व हिदानं जुम्ला जिल्लाया ल्याय्म्हतय्के नं हिदान यायेगु भावना वयेमाः धयागु विश्वास यानागु दु ।’ हिदान लिाप वय्कलं ल्वगितय्त निःशुल्क हि उपलब्ध याकेमाःगु धासें थः थुकिया निंतिं संस्थागत रुपं लगे जुयाच्वनागु खँ कनादिल ।

जुम्लाया संस्कृति संरक्षण तथा सम्बद्र्धन समितिं हिदान ज्याझ्वःया ग्वसाः ग्वःगु खः । भाजु कर्माचार्यं जुम्लाय् नेपाल स्वयंसेवी रक्तदाता समाजया ४० औं जिल्ला शाखा गठन यायेगु निंतिं नं पहल यानाच्वनादीगु दु ।