हलिं नेवाःया स्वंगू बुँदाया जल घोषणा पौ

यल(नेपालभाषा टाइम्स)- हलिं नेवाः गुथिया न्हय्क्वःगु तःमुँज्या व झिंप्यक्वःगु दँमुँज्या स्वंगू बुँदाया जल घोषणा पौ जारी यासे क्वचाःगु दु । गुथिया तःमुँज्यां न्हूगु ज्यासना पुचः नं ल्यःगु खः ।

मूपाहांकथं झायादीम्ह यल महानगरपालिकाया प्रमुख चिरिबाबु महर्जनं ज्याझ्वःया उलेज्या यासें नेवाः वस्ती जल देय्यात सांस्कृतिक संरक्षित क्षेत्र घोषणा यानाः न्ह्याः वनेत तयार दुगु खँ कनादिल ।

गुथिया जल कचाया नायः अकलदास महर्जनया सभापतित्वय् न्ह्याःगु ज्याझ्वलय् वय्कलं जल देय्यात सांस्कृतिक संरक्षित क्षेत्र घोषणा यायेत माग यानादीगु खः ।

ज्याझ्वलय् बागमति प्रदेश सांसद शैलेन्द्रमान वज्राचार्य, उपत्यकाव्यापी सतक विस्तार पीडित संघर्ष समितिया नायः सुमन साय्मि, लाहुर्निपया न्वकु शंकर लिम्बु, गुथिया संरक्षक शान्तप्रकाश श्रेष्ठ, विनोद महर्जन, सुरेश सैंजू लगायतं थःथःगु नुगःखँ तयादीगु खः ।

तःमुँज्यां गुथिया न्हूगु ज्यासना पुचः नं ल्यःगु खः । तिस्तुंगया विनोद महर्जनया अध्यक्षताय् न्हूगु ज्यासना पुचः ल्यःगु खः । न्हूगु ज्यासना पुचःया उपाध्यक्षय् सुरेश सैंजू, सचिवय् अमरकाजी श्रेष्ठ, सहसचिवय् सत्यनारायण श्रेष्ठ, कोषाध्यक्षय् मीना गोपाली व सह कोषाध्यक्षय् सविता नकःमियात ल्यःगु दुसा दुजलय् गोपालकृष्ण नकःमि, सुवर्ण मानन्धर, भवानी प्रधान, हरि महर्जन, सरलगोपाल महर्जन, सुर्यलक्ष्मी महर्जन, उमेशप्रकाश श्रेष्ठ, देव श्रेष्ठ, गौरीशंकर श्रेष्ठ व राजु श्रेष्ठ च्वनादीगु दु ।

नेवाः वस्तीयात नेवाः सांस्कृतिक क्षेत्र घोषणा याकेगु, नेवाः थाय्बाय्या नां प्राचीन नेवाः नां तयेकेगु व नेवाः वस्तीइ नेवाः भासंं च्यागू तगिं तक ब्वंके बीकेगु स्वंगू बुँदाया जल घोषणा पौ जारी यासे क्वचाःगु तःमुँज्याय् स्वनिगः पिने बुटवल, तिस्तुङ, पालुङ, भ्वत, पन्ति व स्वनिगः दुने सक्व, किपू, तोखा, ख्वप, बलम्बु, सतुंगःलिसें थीथी कचापाखें ब्वति काःगु खः ।