नेपाल संवत् नेपाःया गौरवमय राष्ट्रिय सम्पदा ः राष्ट्रपति पौडेल

येँ (रासस)- राष्ट्रपति रामचन्द्र पौडेलं ऐतिहासिक कालं निसें नेपाली जनताया धार्मिक, सांस्कृतिक व सामाजिक जीवनलिसे सतिक दुगु नेपाल संवत् नेपाःया राष्ट्रिय व मौलिक संवत् जूगु खँ धयादीगु दु । नेपाल संवत्या प्रवर्तक शंखधर साख्वाःयात राष्ट्रिय विभूति घोषणा याःगु नीन्यादँ क्यंगु लसताय् राष्ट्रपति भवन शीतल निवासय् ग्वसाः ग्वःगु ज्याझ्वलय् न्ववानादिसें राष्ट्रपति पौडेलं थःगु देय्या नामं स्थापना जूगु विश्वया हे छगू जक संवत् नेपाल संवत् जूगु धासें थ्व संवत् नेपाली जनताया गौरवमय राष्ट्रिय सम्पदा जूगु खँ धयादिल ।

वय्कलं धयादिल, ‘बहुभाषिक, बहुसांस्कृतिक, बहुजातीय देय् नेपाःया सांस्कृतिक विविधतायात एकताया सूत्र अक्षुण्ण यानातय्त नेपाल संवत्या भूमिका महत्वपूर्ण जू धयागु जितः ताः ।’

राष्ट्रपति पौडेलं शंखधर साख्वाःनं थःम्ह आर्जन यानागु निजी सम्पत्तियात समाजया गरिब व उत्पीडित समुदायया हितय् छ्यःगु धयागु विश्वया निंतिं हे छगू उदाहरणीय ज्या जूगु धासें थुगु लोककल्याणकारी ज्या तत्कालीन नेपाली समाजया निंतिं थःथवय् हे छगू क्रान्तिकारी पलाः जूगु खँ धयादिल ।

बागमति प्रदेश सरकारया ग्वसालय् व शंखधर साख्वाः प्रतिष्ठानया संयोजन बागमति प्रदेशया पर्यटन संस्कृति मन्त्री विमल ठकुरीया अध्यक्षताय् ज्याझ्वः जूगु खः । ज्याझ्वलय् बागमति प्रदेश प्रमुख दिपकप्रसाद देवकोटा, मुख्यमन्त्री बहादुरसिंह लामालिसें प्रदेश सरकारया मन्त्रीपिनि उपस्थिति दुगु खः । उगु ज्याझ्वलय् येँ महानगरपालिका, यल महानगरपालिका व मध्यपुर थिमि नगरपालिकायात सम्मान नं याःगु खः ।