
येँ(नेपालभाषा टाइम्स)- थनया असंबहालय् च्वंगु अशोकचैत्य महाविहारया क्वाःपाःछेँ पुनःनिर्माण याइगु जूगु दु । येँ महानगरपालिका २७ वडाया ऐतिहासिक व पुरातात्विक महत्वया क्वाःपाःछेँ पुनःनिर्माणया निंतिं वंगु फागुन १८ गते छगू निमन्त्रणा पुजा याःगु दु ।
क्वाःपाःछेँ पुनःनिर्माणया निंतिं बौद्ध विद्वान प्रा. डा. नरेशमान वज्राचार्य, राज गुरुजु मञ्जुश्रीरत्न वज्राचार्य, गुरुजुपिं भीमरत्न वज्राचार्य व उत्तमवज्र वज्राचार्यपिंसं क्वाःपाःछेया आगं द्यः पुजा यानादीगु खः ।
येँ महानगरपालिकाया आर्थिक ग्वाहालिइ अशोकचैत्य महाविहार संरक्षण समाजया सक्रियताय् पुनःनिर्माण यायेत्यंगु क्वाःपाःछेँया निंतिं निगू करोड न्यय्निगू लखं तकाु लागत अनुमान यानातःगु दु । वाराही अजिमा कन्स्ट्रक्सनं ठेक्का काःगु क्वाःपाःछेँया नक्सा डिजाइन क्वचायेधुंकूगु दु ।
क्वाःपाःछेँ पुनःनिर्माणया निंतिं जूगु निमन्त्रणा पुजाय् बौद्ध विद्वान प्रा. डा. वज्राचार्यं न्हिकं व देखाया विषयय् केन्द्रीत जुयाः थःगु विचाः तयादीगु खः । वय्कलं न्हिकं व देखा कयामतःपिंसं थुकिया दीक्षा कयादीत इनाप यासें याकनं हे थ्व दीक्षा बीगु ग्वसाः जुयाच्वंगु नं जानकारी बियादिल ।
उगु इलय् येँ महानगरपालिकाया पुलांम्ह मेयर विद्यासुन्दर शाक्य, २७ वडाअध्यक्ष योगेशकुमार खड्गी, पुलांम्ह वडाअध्यक्ष चिनियामान वज्राचार्य, शाक्य महाविहार संघया नायः शुभकाजी शाक्य, महासचिव संघरत्न शाक्य लगायतया उपस्थिति दुगु खः ।
LEAVE YOUR COMMENTS