बौद्ध च्वखँ कासाया सिरपाः लःल्हात

येँ – युवा बौद्ध समूहया ग्वसालय् ‘सुखी पारिवारिक जीवनया निंतिं बुद्ध शिक्षा’ विषयय् जूगु च्वखँ कासाय् विजयी जूपिंत वंगु शनिवाः जूगु छगू ज्याझ्वःया दथुइ सिरपाः लःल्हायेगु ज्या जुल । ज्याझ्वःया मूपाहां अखिल नेपाल भिक्षु महासंघया महासचिव भिक्षु कोण्डन्यं च्वखँ कासाय् सिरपाः लःल्हाना बिज्याःगु खः ।

कासाय् दीना कंसाकार न्हाप, ललिता धाख्वा लिउ, सुषमा वज्राचार्य लियांलिउ जुयादीगु खःसा नितेश शाहं सान्त्वना सिरपाः त्याकादीगु खः । कासाय् नीच्याम्हेसिनं ब्वति काःगु समूहं जानकारी बिउगु दु । कासाय् विजयी जूपिंत छसिकथं च्याद्वः, खुद्वः, प्यद्वः व निद्वः तका दां लःल्हाःगु खः ।

ज्याझ्वलय् नवासें भिक्षु कोण्डन्यं बुद्ध शिक्षा जनमानसय् न्यंका वने फत धाःसा विश्वय् शान्ति व अमन चैन काय जुइगु विश्वास प्वंकाबिज्यासें बुद्ध शिक्षा प्रचार प्रसारया निंतिं थुकथंया च्वखँ कासा छगू उपयुक्त माध्यम जूगु विचाः तयाबिज्याःगु खः । समूहया सल्लाहकारलिसें पुलांम्ह मन्त्री नापं निर्णायकमण्डलया दुजः डा. शाक्यं कासाय् ब्वति काःपिं च्वखँ च्वमिपिनिगु टिप्पणी यानादिसें आपालं च्वमिपिनिगु च्वयेगु शैली, विषय प्रवेश व प्रस्तुति नापं आलोचनात्मक विवेचना उत्कृष्ट जूगु खँ धयादिल ।

लुम्बिनी नेप्लिज बुद्धधर्म सोसाइटी, युके व समूहया मंकाः ग्वसालय् दँय्दसं बुद्ध शिक्षाय् आधारित विषयय् थुकथंया च्वखँ कासाया ग्वया वयाच्वंगु खः । कासाय् प्रा. मदनरत्न मानन्धर, डा. केशवमान शाक्य व लोचनतारा तुलाधर निर्णायकमण्डलय् च्वनादीगु खः । समूहया अध्यक्ष तेजनारायण मानन्धरया सभापतित्वय् जूगु ज्याझ्वलय् कासाय् ब्वति काःपिं मेपिं च्वमिपिंत मैत्रि चिं नं लःल्हाःगु खः ।

सम्बन्धित बुखँ

LEAVE YOUR COMMENTS