सागया निंतिं सुुरक्षा व्यवस्था चुस्त : प्रहरी महानिरीक्षक

येँ –  प्रहरी महानिरीक्षक सर्वेन्द्र खनालं १३ क्वःगु दक्षिण एशियाली कासा (साग)या निंतिं सुरक्षा व्यवस्था चुस्त यानागु धयादीगु दु । खेलकुद प्रचार प्रसार तथा प्रकाशन समितिपाखें थनया सोल्टी होटलय् ग्वसाः ग्वःगु पत्रकार सम्मेलनय् सागया सुरक्षा व्यवस्थापनया बारे जानकारी बियादिसें वय्कलं उगु खँ धयादीगु खः ।

सुरक्षा समितिया संयोजक तकं जुयाच्वनादीम्ह प्रहरी महा निरीक्षक खनालं साग कासायात सुरक्षित व सफलतापूर्वक सम्पन्न यायेत सुरक्षाया दक्वं निकायलिसे समन्वय यानाः विशेष सुरक्षा नीति नं तयार यानागु जानकारी बियादिल ।

वय्कलं कासाय् ब्वति कायेत वइपिं विशिष्ट पाहाँपिं, कासामि, व्यवस्थापक सकसितं विमानस्थल, इपिं च्वनीगु होटल, कासा जुइगु थाय् व ज्याझ्वःया उलेज्या जुइगु थासय् तकं सुरक्षा व्यवस्थालिसें ट्राफिक व्यवस्थापन नं तयार यानागु जानकारी बियादिल ।

सागयात ध्यानय् तयाः सम्भावित व अवाञ्छित गतिविधि पहिचान यानाः सुचं संकलन, विश्लेषण यानाः छुं कथं नं कासा प्रभावित याके मबीगु निंतिं तत्काल सुरक्षाकर्मि परिचालित जुइ फइकथं तैनाथ यायेगु नं वय्कलं जानकारी बियादिल ।

अथे हे संवेदनशील थासय् स्ट्राइकिङ व रिजर्भ सुरक्षा पुचः तयारी अवस्थाय् तयेगु नं जानकारी बियादिसें त्रिभुवन अन्तर्राष्ट्रिय विमानस्थलय् सुरक्षा समन्वय डेस्क व कासा जुइगु दक्वं थासय् सुरक्षा कमान्ड पोष्ट नं स्थापना यायेगु खँ वय्कलं न्ह्यथनादिल ।

सम्बन्धित बुखँ

LEAVE YOUR COMMENTS