किपा च्वज्या कासाया सिरपाः लःल्हात

येँ(नेपालभाषा टाइम्स)- जगतसुन्दर ब्वनेकुथिइ वंगु सोमवाः जूगु छगू ज्याझ्वःया दथुइ किपा च्वज्या कासाय् ताःलाःपिंत सिरपाः व दसिपौ लःल्हात । ब्वनेकुथिया ग्वसालय् वल्र्ड नेवाः अर्गनाइजेसन नेपाः देय् मू कवःया प्राविधिक ग्वाहालिइ खुक्वःगु हलिं नेवाः दिंया लसताय् उगु किपा च्वज्या कासा जूगु खः ।

ब्वनेकुथिया युकेजीनिसें गुंगू तगिंया ब्वँमि दथुइ उगु किपा च्वज्या कासा जूगु खः । कासाय् प्रिष्मा खड्गी (युकेजी), सौगात तामाङ (तगिं छगू), विजुमाया स्याङताङ (तगिं निगू, जेशिका लामा (तगिं स्वंगू) व अरुणा लामा (तगिं प्यंगू) न्हाप जुयादीगु खः । अथेहे तगिं न्यागूनिसें गुंगूतक ब्वँमिपिनि दथुइ जूगु कासाय् छसिकथं रुप्सी गौतम, युरिना महर्जन, राज नेपाली, सम्बृद्धि शाही व सुष्मा घले न्हाप लाःगु खः ।

कासाय् न्हाप जुयादीपिंत मूपाहांकथं झायादीम्ह न्हूजः गुथिया नायः सुरबहादुर श्रेष्ठं पदक दसिपौ व थीथी सिरपाः लःल्हानादीगु खः ।

ज्याझ्वलय् मूपाहां श्रेष्ठलिसें हलिं नेवाः दबूया केन्द्रीय मूछ्याञ्जे सोभित शाक्य, ब्वनेकुथिया संस्थापक राजभाई जकःमि, वल्र्ड नेवाः अर्गनाइजेसन नेपाः देय् मू कवःया पुलांम्ह नायः शाक्य सुरेन, नांजाःम्ह चित्रकार चन्दा श्रेष्ठं किपा च्वज्या कासा व थुकिया महत्वया विषयय् नुगःखँ तयादीगु खः ।

ज्याझ्वः नेपाः देय् मू कवःया नायः सुरेन्द्रभक्त श्रेष्ठया सभापतित्वय् जूगु खःसा विद्यार्थीतय्सं च्वःगु किपा नं ब्वज्या याःगु खः ।