भिक्षु अश्वघोषयात राज्यपाखें उपचार खर्च

येँ – श्रद्धेय संघनायक भिक्षु अश्वघोष महास्थविरया सम्पूर्ण वासः खर्च नेपाल सरकारं व्यहोरे याइगु जूगु दु । थौंकन्हय् वसपोलयात तोखाया ग्राण्डी अस्पतालय् तयाः वासः याकातःगु दु । वसपोल उसाँय् बांलाकाः विहार लिहां बिज्याइबलय् अन जुइगु सम्पूर्ण उपचार खर्च नं सरकारं हे व्यहोरे यायेगु निर्णय नं जूगु खँ सीदुगु दु ।

म्हिगः भिक्षु अश्वघोषया स्वास्थ्यस्थिति सीकेत उपप्रधान लिसें रक्षामन्त्री ईश्वर पोखरेल नं अस्पताल झाःगु खः । अन नं वय्कलं सम्पूर्ण खर्च सरकारं व्यहोरे याइगु निर्णय जूगु जानकारी बियादीगु खँ भिक्षु महासंघया सचिव भिक्षु कोण्डन्यं नेपालभाषा टाइम्सयात कनाबिज्यात । वसपोलया वासः खर्च राज्यपाखें व्यहोरे याकेगु ज्याय् येँया सांसद कृष्णगोपाल श्रेष्ठं विशेष पहल यानादीगु खः ।

उसाँय् मदुम्ह अश्वघोष भन्तेया स्वास्थ्यय् आः नं छुं सुधार धाःसा मवःनिगु खँ धाःगु दु । वसपोलयात हाइ केयर युनिटय् तयाः वासः याकातःगु खःसां अन छुं सुधार मजुइवं आः क्याबिनय् सारे याःगु दु । थौंकन्हय् वसपोलं फाट्टफुट्ट मिखा कनाबि–ज्याइगु खँ भिक्षु कोण्डन्यं कनाबिज्याःगु दु ।