आः पुनर्स्थापित संसदय् नेपाली कांग्रेसया मू भूमिका

येँ – सर्वोच्च अदालतं संसद पुनर्स्थापनाया फैसला यायेवं आः देय्या राजनीतिं छु मोड काइ धइगु जिज्ञासा सकभनं न्यना वंगु दु । तर संसद पुनर्स्थापना जूसां नं थ्वयां लिपाया राजनीतिक मोड गन वनी धइगु खँ धाःसा स्पष्ट जूगु मदुनि । खतुं संसद पुनस्र्थापना जुल धाःसा प्रधानमन्त्री केपी ओलीं मेगु अध्यादेश हयाः जूसां हानं मेकथंया अप्रत्याशित खेल म्हिते फइगु आशंका जुयाच्वंगु खः । तर सर्वोच्च अदालतं आः वइगु झिंस्वन्हुया दुने हे संसद समेत सःति धकाः निर्देशन जारी याःगु कारणं आः प्रधानमन्त्रीं अध्यादेश हये फइगु नं सम्भावना मन्त ।

लिसें वय्कलं संकटकाल लागू याये फइगु खः लाकि धइगु नं आशंका जुयाच्वंगु खः । तर संसद हे सःतेगु आदेश वःगु जुयाः वय्कलं अज्याःगु नं छुं याये फइगु सम्भावना मदुगु खँ धाःगु दु ।

तर सर्वोच्चं सःतके बिउगु संसद दुने आः गज्याःगु राजनीतिक कासा जुइ धइगु खँ धाःसा स्पष्ट जूगु मदुनि । संसद विघटन याःम्ह प्रधानमन्त्री जूगु कारणं प्रम ओलीं तुरुन्त हे राजीनामा बीमाःगु अवस्था वइ । तर वय्कःया पार्टी नेकपा विभाजित जुइधुंकूगु कारणं आः नेकपाया हे सरकार दइगु सम्भावना मदु । बहुमत सांसद पुष्पकमल दाहाल व माधव नेपाल पक्षय् दुगु जुयाः तःधंगु दल थ्वहे पार्टी जू वइगु सम्भावना दु । अथे खःसां दाहाल-नेपाल पुचःयाके सरकार हे गठन याये फइकथंया बहुमत धाःसा मदु । नापं जसपालिसे जानाः नं थ्व पार्टीं सरकार गठन याये फइ मखु । सरकार गठनया लागिं नेपाली कांग्रेसया साथ मकासें मगाः ।

आः न्हूगु सरकार गठन यायेगु लागिं कांग्रेस निर्णायक शक्ति जुइगु कारणं कांग्रेसयात ओली व दाहाल निगुलिं पुचलं प्रधानमन्त्री चले या धकाः अफर याइगु सम्भावना दु । नापं अज्याःगु अफर वने नं धुंकूगु दु । तर कांग्रेसं धाःसा आः तक थम्हं सुलिसे जानाः सरकार दयेकेगु धकाः धाःगु मदुनि । नैतिक रुपं कांग्रेसं संसद विघटन थेंज्याःगु असंवैधानिक ज्या याःम्ह ओलीलिसे जानाः सरकार दयेकेगु पाय्छि जुइ मखु ।

छुं जुयाः कांग्रेसं थः सरकारय् वनेत इच्छुक मदु धकाः सत्ता राजनीतिइ इच्छा मक्यन धाःसा छुं नं दलं सरकार गठन याये फइ मखु । यदि वर्तमान संसदं सरकार गठन याये मफुत धाःसा संविधान कथं संसद विघटन यानाः हानं चुनावय् हे वनेमाःगु अवस्था वयेफु । उकिं थ्व इलय् आः कांग्रेसया निर्णय महत्वपूर्ण जुइगु खँ धाःगु दु ।

सम्बन्धित बुखँ

LEAVE YOUR COMMENTS