ने. सं. ११४४ ञलाथ्व दशमी -

राष्ट्र संघय् नेवाः विस्थापन मुद्दा

नश्लीय विभेद उन्मूलन अनुगमन समितिइ नेपाःयात न्ह्यसः
येँ – संयुक्त राष्ट्र संघया नश्लीय विभेद उन्मूलन अनुगमन समिति (सर्ड) या ९५ क्वःगु सेशनय् स्वनिगःया नेवाःतय्त विस्थापित यानाः सतक विस्तार यायेत्यंगु खँ पिदंगु दु ।उगु समितिइ नेपाल सरकारया प्रतिनिधित्व यासें वःपिं सरकारी पदाधिकारीतय्त समितिया दुजःतय्सं थ्व बारे न्ह्यसः तःगु खँ अन थ्यनाच्वंम्ह जनजाति आन्दोलनया न्ह्यलुवा कानून व्यवसायी शंकर लिम्बुं कनादीगु दु ।

समितिया दुजःतय्सं स्वनिलय् सतक विस्तार यायेगु नामय् स्वनिगःया छगूत्या लाख जनता, गुकी ९० प्रतिशत स्वयां अप्वः नेवाःत दु, यात विस्थापित यायेगु व नेवाःतय्गु आदिवासी पहिचान संस्कृति नष्ट यायेत्यंगु बारे न्ह्यसः तःगु खः । स्वनिगःया रैथानेतय्त मेगु विकल्प मबिसे घरवारविहिन यायेत्यंगु बारे नं अन न्ह्यसः पिहां वःगु खँ वय्कलं कनादीगु दु ।

अथे हे थीथी थासय् सञ्चालन यायेत्यंगु हाइड्रो प्रोजेक्ट निर्माणय् स्थानीय जनताया अधिकारयात थाय् मबिउगु व टिकापुर घटनायात कयाः छम्ह अपांग लगायत निम्ह मस्तय्त समेत वंगु स्वदँ न्ह्यवंनिसें कुना तःगु बारे नं अन पिदंगु खः । सशस्त्र द्वन्द्वय् नश्लीय विभेद उन्मुलनया खँ नं वःगु खः । आः उमिसं थ्व खँ त्वःतेवं थुगु मुद्दा छु जुइ धइगु न्ह्यसः नं उमिसं तःगु खः ।

नेपाःया प्रतिनिधितय्त समितिया दुजःतय्सं नेपालं थीथी देशय् खटे याइपिं कुटनीतिक नियोगय् गुलि प्रतिशत आदिवासी जनजातियात दुथ्याका धकाः नं न्ह्यसः तःगु खः । संयोगवश, उगु समितिइ लिसः बिउ वःपिं नेपाली प्रतिनिधि मण्डलया सकलें दुजःत नं छगू हे नश्लयापिं लानाच्वन ।

नेपाःया प्रतिनिधि मण्डलं थ्व समस्या थःपिं हे जानाः मिले याये, लिपा संशोधन याये धकाः जक लिसः बिउगु खँ नं वय्कलं कनादीगु दु ।