स्वांयाःपुन्हिकुन्हु तःजिगु बुद्ध पुजा

थिमि – नगदेश बौद्ध समूह व बौद्ध ल्याय्म्ह पुचःया मंकाः ग्वसालय् २५६२ क्वःगु स्वांयाःपुन्हिया लसताय् छगू तःजिक बुद्ध पुजा ज्याझ्वः जुल । शाक्यमुनि भगवान बुद्धया जन्म, संबोधि लाभ व महापरिनिर्वाण थेंज्याःगु त्रिसंयोग चूलाःगु दिंया लसताय् विहारया धम्महलय् उगु ज्याझ्वः जूगु खः ।

समूहया अध्यक्ष दीपकराज साँपालया सभापतित्वय् जूगु बुद्ध पुजाय् मूपाहांकथं अनागारिका केशावति गुरुमां व विशेष पाहांकथं अनागारिका खेमावति गुरुमां बिज्याःगु खः ।पुचःया अध्यक्ष शिवभक्त मेजुं लसकुस यानादीगु ज्याझ्वः मूपाहां केशावति गुरुमांनं दीप प्रज्ज्वलन यासे बुद्ध मूर्तिइ स्वां देछानाः उलेज्या यानाबिज्याःगु खः ।

बौद्ध उपासक कृष्णकृमार प्रजापतिं बुद्धजीवनी व स्वांयाःपुन्हिया महत्व बारे कनादीगु ज्याझ्वलय् विहारया निंतिं आर्थिक ग्वाहालि यानादीम्ह उपासिका केशरीमाया दुवालयात मूपाहांपाखें दोसल्लां न्ययेकाः, खादां क्वखायेकाः बुद्धमूर्ति नं लःल्हाना बिज्याःगु खः ।अथे हे थः मांअबुया नामं विहारया निंतिं भौतिक ग्वाहालि यानादीपिं दिलकृष्ण प्रजापति व राधेश्याम प्रजापतियात नं खादां न्ययेकाः बुद्धमूर्ति लःल्हाना बिज्याःगु खः ।

ज्याझ्वःया विशेष पाहां खेमावति गुरुमांनं धर्माेपदेश बियाबिज्यायेगु झ्वलय् विहार दयेकाः दान यायेवं पुण्य प्राप्त जुइगु धासें थम्हं नं विहार निर्माण यायेगु बारे बांलाःगु सन्देश प्रवाह यानाबिज्याःगु खः । पुण्यानुमोदन यासें क्वचाःगु ज्याझ्वः लिपा बुद्धया पवित्र अस्थिधातुया पुजा योगु ज्या नं जूगु खःसा न्हिनसिया इलय् बुद्धमूर्तियात खतय् तयाः सांस्कृतिक बाजंलिसें नगर परिक्रमा याःगु खः ।