नेवाः नखः न्यूयोर्कया मंकाः म्हपुजा

येँ – नेपाल संवत् ११३९ न्हूदँया लसताय् नेवाः नखः न्यूयोर्कपाखें मंकाः म्हपुजा नापं न्हूदँया नगुमा (क्यालेण्डर) नं पितब्वज्या याःगु दु । नेवाः नखः न्यूयोर्कया ग्वसालय् जूगु थ्व खुक्वःगु मंकाः म्हपुजा खः ।वंगु कछलाथ्व पारुकुन्हु न्यूयोर्कय् च्वंगु शेर्पा किदुग हलय् न्हूदँ क्यंगु लसताय् विशेष ज्याझ्वः यासें खुक्वःगु मंकाः म्हपुजा याःगु नः ।

म्हपुजाया हे झ्वलय् ने.सं. ११३९ न्हूदँया नगुमा नं पिथनेगु ज्या याःगु खः । मंकाः म्हपुजाय् नेवाःतलिसें गैर नेवाःतय्गु संघसंस्थाया प्रतिनिधिलिसें विदेशी पाहांपिंसं नं ब्वति काःगु खः ।संस्थाया मूछ्यांजे डा. नरेशमान शाक्यं नेपाल संवत् व म्हपुजाया बारे कनादीगु ज्याझ्वलय् संस्थाया निम्हम्ह न्वकु बिमला श्रेष्ठ, दांभरिं दीपक प्रधान, लिउ दांभरिं सुजन श्रेष्ठ, सल्लाहकार राजकुमार श्रेष्ठ लगायतं लसकुस यानादीगु खः ।

संस्थाया न्हापांम्ह न्वकु महेन्द्रवीर वज्राचार्यं लसकुस न्वचु बिसें न्हूदँया लसताय् भिंतुना देछानादीगु ज्याझ्वलय् संस्थाया संस्थापक नायः वीरेन्द्र प्रधानं नेपाल संवत् व म्हपुजाया महत्वया बारे कनादीगु खः ।मूपाहां नेपाल कन्सुलेटया कार्यवाहक महावाणिज्य दूत पुष्पराज भट्टराईं न्हूदँया नगुमाया पितब्वज्या यानादीगु ज्याझ्वलय् वय्कलं नेपाल संवत्या महत्वयात कयाः थःगु नुगःखँ प्वंकादिसें भिंतुना देछानादीगु खः ।

संस्थाया सल्लाहकार अजयमान छोचुं नं म्हपुजाया मन्त्रविधि ब्वनादीगु ज्याझ्वलय् न्यूयोर्क सिटीया मेयर बिल दे बलाजियोजुं छ्वया हयादीगु भिंतुना सन्देश मूछ्यांजे शाक्यं ब्वनाः न्यंकादीगु खः ।संस्थाया मिसा स्वयमसेवक संस्थाया दुजःपिंसं म्हपुजाय् व मिजं स्वयमसेवकपिंसं भ्वजय् ग्वाहालि यानादीगु ज्याझ्वलय् सांगीतिक ज्याझ्वः नं जूगु खः ।

 

सम्बन्धित बुखँ

LEAVE YOUR COMMENTS