झीगु सःया निसःब्व थ्यन, निम्ह संचारकःमि सम्मानित
येँ (नेपालभाषा टाइम्स)- टेलिभिजन पत्रकारिताया क्षेत्रय् नेपालभाषाको माध्यमं सञ्चार यात्रा न्ह्याकाच्वंगु झीगु सः टिभि ज्याझ्वः क्यनेज्या निसः ब्व पूवंगु लसताय् जूगु लसता हने ज्याझ्वलय् नेपालभाषा टेलिभिजन ख्यःया निम्ह न्ह्यलुवाःपिंत हनेज्या याःगु दु ।
लहना मिडियाया ग्वसालय् जूगु उगु ज्याझ्वलय् बागमति प्रदेशया श्रम, रोजगार व यातायात मन्त्री प्रेमभक्त महर्जनपाखें संचारकःमिपिं मीना बज्राचार्य व बिराजकाजी राजोपाध्याययात वय्कःपिनिगु योगदानयात कदर यासें सम्मान याःगु खः । उगु हे ज्याझ्वलय् संचारकःमि अमरध्वज लामा बल रेडियो नेपालया कार्यकारी निर्देशक पदय् नियुक्त जुगुलिं लहना मिडिया व झीगु सःपाखें भिन्तुना नं देछाःगु खः । ज्याझ्वलय् न्ववानादिसें मू पाहाँ माननीय मन्त्री महर्जनं, “नेपालया अमूल्य सम्पदा धयागु नेपालभाषा व नेवाः संस्कृति खः । थ्वहे खँयात ध्यानय् तया बागमति प्रदेश सरकारं नेवाः भाय् व तामांग भाययात सरकारी कामकाजी भाय्या कानूनी मान्यता बिइधुंकूगु अवस्था दुु । आः उकि यात कार्यान्वयन याना यंकेगु खँय् झी थःहे न्ह्यचिलेमाः’ धयादिल ।
झीगु सः टिभि ज्याझ्वःया निर्माता निर्देशक विजयरत्न असंबरें सभापतिया थासं न्ववासें नेपालभाषाया टेलिभिजन पत्रकारिताया शुरुआति दिनं निसेंया विकासक्रम बारेया खँ न्ह्यथना दिल । ज्याझ्वलय् नेवाः पत्रकार राष्ट्रिय दबूया वरिष्ठ उपाध्यक्ष सुनिल महर्जन, लहना मिडियाया व्यवस्थापक व दबूया उपाध्यक्ष सुरेन्द्रभक्त श्रेष्ठ व लहना व पत्रकार दबूया अध्यक्ष नृपेन्द्रलाल श्रेष्ठ लगायतं नं नुगःखँ तयादीगु खः ।
सांगितिक ज्याझ्वः नं न्ह्यब्वःगु उगु ज्याझ्वलय् सबिना मानन्धर, लसता जोशी, सानुबाबु महर्जन, सुरज व्यन्जनकार, अमर चित्रकार, अमोघवीर बज्राचार्य, रोजी श्रेष्ठ डंगोलं म्ये न्यंकादीगु खःसा शास्ता बज्राचार्य, उत्पला बज्राचार्य, सम्पदा बज्राचार्यपिंसं नं थःथःगु प्रस्तुति न्ह्यब्वयादीगु खः ।
LEAVE YOUR COMMENTS