फास्ट ट्राय्क विरुद्ध रिट तइगु

म्वायेत तक हे मगाक्क मुआब्जा बीत्यंगु द्वपं

येँ – संघीय राजधानी येँदेय्लिसे निजगढयात अःपुक स्वायेगु लागिं बुंग व खोनाय् दयेकाच्वंगु फास्ट ट्राय्क विरुद्ध आः स्थानीय जनतां सर्वोच्च अदालतय् मुद्दा तयेगु तयारी यानाच्वंगु खँ सीदुगु दु । बुंगया स्थानीय वासिन्दा राम खड्गीं बियादीगु जानकारी कथं आः वइगु छवाःया दुने मुद्दा दर्ता यायेगु कथं तयारी जुयाच्वंगु दु ।

स्थानीय जनतां सरकारपाखें थःपिंत बिउगु मुआब्जा मगाः धकाः ताः ई निसें आन्दोलन याना वयाच्वंगु खःसां सरकारं धाःसा दमन हे यानाः फास्ट ट्राय्क दयेकेगु ज्या धमाधम न्ह्याकूगुलिं स्थानीय जनता व बुंगद्यःलिसे सम्बन्धित थीथी गुथिपाखें मंकाः कथं फास्ट ट्राय्क विरुद्ध मुद्दा तयेगु तयारी यानाच्वंगु खः ।

फास्ट ट्रायक दयेकीगु मार्गय् बुंगद्यःया नं आपालं जग्गा लाःगुलिं थुकिं यानाः लिपा बुंगद्यःया जात्रा सञ्चालनय् हे लिच्वः लायेफु धासें गुथिपाखें मुद्दा दर्ता यायेत्यंगु खः । स्थानीय रत्नमान तुलाधरया कथं फास्ट ट्रायक दयेकेगु झ्वलय् बुंग व खोनाया ७० प्रतिशत ज्या क्वचायेधुंकूगु दुसा स्थानीय जनतां विरोध यानाच्वंसां नं सेनां अन ज्या यायेगु धाःसा दिकूगु मदुनि ।

थ्व कारणं यानाः नं आः थःपिंके सर्वोच्च अदालतय् मुद्दा तयेगु बाहेक मेगु विकल्प मंत धासें वय्कलं छवाःया दुने मुद्दा तयेगु कथं तयारी जुयाच्वंगु जानकारी बियादिल । मुद्दा तयेगु निंतिं बुंगद्यःलिसे सम्बन्धित बोसी गुथि, पर्जा गुथि व पान्जु संघ लिसें स्थानीय वासिन्दापाखें नं मंकाः उजुरी पौ च्वयेगु तयारी यानाच्वंगु दु ।

अथे हे खोनाया इन्द्रायणी गुथिं नं फास्ट ट्राय्क विरुद्ध मुद्दा तयेत्यंगु खँ धाःगु दु । सरकारं मुआब्जा बीगु झ्वलय् लँ मदुगु जग्गायात प्रति रोपनी २५ लाख तका बियाच्वंगु दुसा गोरेटो लँय् ३४ लाख प्रति रोपनीया ल्याखं मुआब्जा बियाच्वंगु दु । तर स्थानीय वासिन्दा इन्द्र तुलाधरया कथं थौंकन्हय् बुंग व खोनाय् लँ मदुगु जग्गा हे प्रति आना ६ लाख तकां कारोवार जुयाच्वंगु दुसा गारेटो लँ दुगु जग्गा प्रति आना १२ लाख तकां कारोबार जुयाच्वंगु दु ।

स्थानीय जनतां थःपिंत आनां न्हय्गू निसें च्यागू लाख तका तक मुआब्जा बीमाः धकाः माग यानाच्वंगु खः । सरकारं बिउगु मुआब्जा थःपिंत तसकं अन्याय जूगु खँ भाजु इन्द्र तुलाधरं कनादिल । वय्कलं धयादी, ‘जिमित चलन चल्तीया भाः म्वाः, तर जीविकोपार्जन याये फइगु कथं ला मुआब्जा बी माल नि ।’सेनां न्ह्याकाच्वंगु फास्ट ट्राय्क निर्माणया झ्वलय् थौंकन्हय् ट्राय्क खोले यायेगु ज्या न्ह्यानाच्वंगु दु ।