सेयर मार्केट बिल्डिङय् मि च्यात

थनया पुतलीसतकय् स्थित सेयर मार्केट बिल्डिङया लिसें मेगु निखा छेँय् मि नःगु दु । शेयर मार्केट बिल्डिङय् तयातःगु छगू कन्सल्टेन्सि ज्याकुथिइ ग्यास विस्फोट जुयाः मि च्याःगु खः । ग्यास विस्फोट जुयाः थ्व बिल्डिङ लिक्कसं लाःगु मेगु निखा छेँय् नं मिं थिउगु खँ धाःगु दु ।

प्रत्यक्षदर्शीतय्सं धाःकथं सुथय् १० बजे पाखे बिल्डिङया प्यंगूगु तँय् च्वंगु ज्याकुथि चायेकःवंबलय् ग्यास विस्फोट जूगु खः । ग्यास विस्फोट जुयाः सुं घाःपाः जूगु खबर मवःनि । तर विस्फोट लिपा तसकं मि च्याःगुलिं येँ, यल, ख्वपया लिसें सेना व प्रहरीया दमकल हयाः मि स्याःगु खः ।

ग्यास विस्फोट गथे जुयाः जूगु धयागु सीमदुनि । तर ज्याकुथि चायेकःवंम्ह छम्ह मिसा धाःसा आः ज्याकुथिया साहुपिंसं थःत पाः याइ धकाः ग्यानाः हालाजूगु खँ प्रत्यक्षदर्शीतय्सं धाःगु दु ।