चाबहिली ताँ उलेज्या

येँ (नेपालभाषा टाइम्स) – येँ महानगरपालिकाया मेयर विद्यासुन्दर शाक्यं चाबहिली दयेकूगु न्हूगु आकाशे ताँया उलेज्या यानादिल । माल धाःसा स्यंकाः हानं मेथाय् यंके जिउगु उगु ताँ ८२ लाख ६६ हजार तका खर्च यानाः दयेकूगु खः । म्हिगः मेयर शाक्यं छगू ज्याझ्वःया दथुइ उकिया उलेज्या यानादीगु खः ।

वंगु असार २७ गते दुने ताँ दयेके सिधयेमाःगु खःसां कोरोनाया कारणं लिबाःगु खः । उलेज्या लिपा जूगु ज्याझ्वलय् न्ववासें मेयर शाक्यं मित्रपार्कं पशुपति वनेगु लागाय् नं चाबबहिली थेंज्याःगु ताँ दयेकेत माग जूगुलिं उकिया निंतिं नं प्रक्रिया न्ह्यायेधुंकूगु जानकारी बियादिल । वय्कलं फिब्व ख्यःया ताँ दयेकेगु ज्या क्वचायेधुंकूगु व थुगु दँय् थीथी थासय् ताँ दयेके ज्या क्वचाइगु खँ कनादिल ।