कायाष्टमीकुन्हु सुथय् यःसिं हनुमानध्वाखा थ्यंकीगु

येँ(नेपालभाषा टाइम्स)-यैँयाःया निंतिं यःसिं भोताहितिइ थ्यंके हःगु दु । ख्वपया सूर्यविनायक नगरपालिका १० वडास्थित यःसिंगुँ (चित्तपोल)या सामुदायिक वनपाखें यःसिं साला हयाः भोताहितिइ थ्यंके हःगु खः ।
नेपाल पञ्चांग निर्णायक विकास समितिं बिउगु साइतकथं वंगु यंलाथ्व दुतियाकुन्हु साइत यानाः यःसिं काः वंगु खः । वकुन्हु सुथय् गुरुजुया पल्टनलिसें केन्द्रीय मानन्धर संघया पदाधिकारीपिं साइत यानाः यःसिं काः वनेत हनुमानध्वाखां पिहां वःगु खःसा उकुन्हु हे बहनि यःसिंगुँइ यःसिं काः वंगु खः ।

थुगुसीया येँयाःया निंतिं यःसिं पाले न्ह्यः अन बलिसहितया विधिवत पुजा याःगु खः । अनंलि यःसिंगुँनिसें हे साला हयाः भोताहितिइ थ्यंके हःगु खः । भोताहितिइ थ्यंके हःगु यःसिं यंलाथ्व अस्तमि (कायाःस्तमि)कुन्हु नगर प्रवेश याकेगु धकाः हनुमानध्वाखाय् साला हइ । थुगुसी समितिं बिउगु साइतकथं सुथसिया कायास्तमिकुन्हु सुथसिया १०ः३२य् नगर प्रवेश याकी ।

हनुमानध्वाखाय् थ्यंके हःगु यःसिं वइगु यंलाथ्व द्वादशिकुन्हु थनी । यःसिं थनेवं येँया विधिवत रुपं शुरु जुइ । थ्व स्वयां न्ह्यः यंलाथ्व एकादशिकुन्हु सनिलय् चस्वांद्वँ मानन्धर गुथियापिंसं यःसिंलय् वलः धायेगु याइ । वलः घायेगु धइगु यःसिं थनेत माःगु खिपः परम्परागत रुपं चिइगु खः ।
थुगुसी यँलाथ्व द्वादशि, आइतवाःकुन्हु सुथसिया ८ः२६ ताः इलय् यःसिं थनी ।