नांजाःम्ह गायक जुजुकाजी रंजितयात ‘अमरज्योति सम्मान’

येँ – नेपाल विद्युत प्राधिकरण विद्युतकर्मी साहित्यिक समाजं विद्युतकर्मिपिं निम्हेसित शुक्रवाः प्राधिकरणया हलय् सम्मान याःगु दुसा उगु हे ज्याझ्वलय् ‘अमरज्योति’ सफू पितब्वज्या नं याःगु दु ।रामेश्वर राउत ‘मातृदास’या सभापतित्वय् जूगु थुगु ज्याझ्वलय् नांजाःम्ह गायक जुजुकाजी रंजितयात ‘अमरज्योति गायन’ सम्मान व देवेन्द्र अधिकारी ‘दुखी माहिला’यात ‘अमरज्योति साहित्य’ सम्मान नेपाल प्रज्ञा प्रतिष्ठानया उपकुलपति डा. जगमान गुरुङं ल्हानादीगु खः ।

वि.सं. २०२२ सालंनिसें रेडियो नेपालय् म्येँ हालेगुलिइ पलाः न्ह्याकादीम्ह प्राधिकरणया इञ्जिनियर नांजाःम्ह गायक जुजुकाजी रंजितं सामाजिक, धार्मिक व राष्ट्रिय जागरणया नेपाली व नेपालभाषाया निसः स्वयां अप्वः म्येँ हालादीधुंकूगु दुसा भोजपुरी व मैथिली भाषाया म्येँ नं हालादी धुंकूगु खँ नं जानकारी बियादिल ।

वयकलं थःगु कर्मथलो जलविद्युत निर्माण यायेगु ज्याया झ्वलय् काली गण्डकी, मोदी खोला लगायत थीथी थासय् वनीगु इलय् संगीत व कर्मथलोयात नापनापं यंकाच्वंगु खँ नं न्ह्यथनादिल । अथे हे अधिकारीयात प्राधिकरणं उगु इलय्या परिस्थितियात विषयवस्तुकथं न्ह्यब्वयेफुम्ह कवि दयेका बिउगु खँ नं न्ह्यथनादिल ।

सम्बन्धित बुखँ

LEAVE YOUR COMMENTS