लुबौविया न्हूम्ह उपकुलपतिइ प्रा. डा. वज्राचार्य

येँ – लुम्बिनी बौद्ध विश्वविद्यालयया न्हूम्ह उपकुलपतिइ प्रा. डा. हृदयरत्न वज्राचार्य नियुक्त जुयादीगु दु । नवनियुक्त उपकुलपति प्रा.डा. वज्राचार्यं वंगु शुक्रवाः हे थःगु पदभार ग्रहण यानादीगु खः । पदभार ग्रहण यासें नवनियक्त उपकुलपति प्रा. डा. वज्राचार्यं बौद्धमार्गयात न्ह्यःने यंकेगु प्रतिवद्धता प्वंकादिसें विश्वविद्यालययात विश्वस्तरय् तक थ्यंकेगु निंतिं थः प्रतिवद्ध दु धयादिल ।

लिसें वय्कलं थः विश्वविद्यालयया गरिमायात कायम यानातयेगु निंतिं सक्रिय रुपं लगे जुयाः न्ह्याः वनेगु नं प्रतिवद्धता प्वंकादिल । ज्याझ्वःया सभापतिलिसें निमित्त उपकुलपति नापं विश्वविद्यालयया रजिष्ट्रार तिलकराम आचार्यं विश्वविद्यालययात व्यापक दयेका यंकेत सहमति, सहकार्य व प्राज्ञिक उन्नयन यानाः न्ह्याः वनेमाःगु खँय् बः बियादिल ।

नवनियुक्त उपकुलपति वज्राचार्ययात उगु इलय् विश्वविद्यालयया पदाधिकारी, प्राध्यापकलिसें कर्मचारीतय्सं लसकुस याःगु खः । विश्वविद्यालयपाखें ग्वसाः ग्वःगु लसकुस ज्याझ्वलय् प्रा. डा. गितु गिरी, परीक्षा नियन्त्रक सिद्धिश्वरमान श्रेष्ठ, केन्द्रीय क्याम्पसया क्याम्पस प्रमुख फणिन्द्रकुमार न्यौपाने, प्रशासन प्रमुख गजेन्द्र गुप्ता लगायतं थःथःगु नुगःखँ तयादीगु खः ।