सुथय् हे दागिं वनीपिं व पाल्चा बीपिं चाःहिल

येँ – कोरोना भाइरसया महामारीं यानाः येँयाः फुक्क धयाथें जात्रा दिइवं थौं सुथय् हे दागिं वनीपिं व पाल्चा बीपिं चाःहिउ वःगु खनेदुगु दु । येँयाः जात्राया न्हिया ल्याखं थौं कुमारीया रथ सालेगु लिसें दागिं पिहां वइगु, बौमत हयेगु यायेमाःगु खः । अथेहे थौं थीथी जातियापिं पाल्चा बी वनेगु नं याइगु खः । तर कोरोना संक्रमणया ग्याःचिकुं छुं नं कथंया जात्रा मजुइगु जुइवं दागिं वनेमाःपिं मनूत सुथय् ४ बजे निसें हे दागिं चाःहिलीगु रुटय् थीथी बीबः ह्वलाः वःगु खनेदुगु खः । अथेहे पाल्चा बीवनेमाःपिं नं सुथय् हे पाल्चा तया वःगु खः ।

छेँय् सुं नं जः मन्त धायेवं येँयाःया झ्वलय् नेवाः संस्कार कथं पाल्चा तःवनेगु, दागिं वनेगु आदि संस्कार याइगु खः । ज्यापु लगायत छुं जातियापिंसं यःसिं थनीकुन्हु हे पाल्चा बिउवनेगु याइसा छुं जातियापिंसं कुमारी साली कुन्हु पाल्चा तःवनेगु याइ । थ्व हे झ्वलय् वंगु द्वादशी कुन्हु नं सुथय् न्हापनं हे पाल्चा तःवनीपिं वःगु खनेदुगु खः ।