टिकट थिके खः, अय्नं दर्शक म्हो जुइमखु : सतिश महर्जन

नेपालभाषा ख्यलय् थुगुसी न्हापांखुसी न्याद्वः व स्वद्वः टिकटया मू तयाः वइगु बैशाख २२ गते सनिवाः होटेल याक एण्ड यतिइ ‘लाइभ म्यूजिकल इभिनिङ’ नामं नेपालभाषाया सांगीतिक ज्याझ्वः जुइत्यंगु दु । टिकटया मू तसकं हे थिके जुल धाइपिं आपालं मनूत नं खने दयाच्वंगु दु ।

थ्व सम्बन्धय् उगु हे ज्याझ्वलय् थःगु म्येँ न्ह्यब्वयादीत्यंम्ह नेपालभाषाया नांजाःम्ह म्येँ हालामि नापं ज्याझ्वःया छम्ह ग्वाहालिमि सतिस महर्जनयाके न्यनाबलय् वय्कलं ‘स्वद्वः व न्याद्वः टिकटया मू नेपालभाषा ख्यःया लागिं तसकं हे थिकेगु थें च्वं, तर अथे मखु’ धयादिल ।

वय्कःया कथं ज्याझ्वःया उद्देश्य हे तसकं च्वन्ह्याःगु जूगुलिं थ्व ज्याझ्वः स्वयेत नेवाः ख्यःयात माया याइपिं गाक्कं दर्शकतय् सहभागिता दइ धइगु वय्कःया विश्वास खः । थम्हं नं थः पासापिंत ‘न्याद्वः वंगु टिकट कया बी माल’ धयागु इलय् न्हापां ला तसकं थिके थें खंकूगु तर उगु ज्याझ्वलं नेवाः कलाकारतय्त स्वास्थ्य उपचार कोष खडा यायेगु ताः तयातःगुलिं थ्व पाय्छि खः धयादिल ।

गायक सतिश महर्जनं २२ गते जुइगु थुगु इभेन्टय् ‘मू मदुगु जिन्दगी’ धइगु नेपालभाषाया संकिपाय् थम्हं हे हालातःगु म्येँ ‘ए पासा छ लिक्क…..’ बोलया म्येँ हालादीगु जूगु दु । थः छम्ह नं उगु ज्याझ्वःया ग्वाहालिमि जूगुलिं वय्कः थः स्वयम नं थौंकन्हय् तसकं लिमलाःफमलाः लगे जुयाच्वनादीगु दु । सुथंनिसें बहनीथ्यंकं ज्याझ्वःया तयारी व टिकट मीगु ज्याय् लगे जुयाच्वनादीगु दु ।

वय्कःपिंसं प्यसःपाः टिकट मीगु अपेक्षा यानाच्वंगु दु । अथेहे मेम्ह आयोजक कमिटीया दुजः राजेश महर्जनं धाःसा प्यसःपा टिकट बाहेक नं अन पत्रकार, कलाकार व मेमेपिं मजिमगाःपिं प्राविधिक पुचःया मनूतनापं यायेबलय् उकुन्हुया इभेन्टय् म्होति नं ५५० म्ह मनूत खाइगु जानकारी बियादिल ।

थुलि स्वकुमिपिं छगू हे ज्याझ्वःया निंतिं छगू हे थासय् उकिसनं स्वद्वःनिसें न्याद्वः टिकटया मू पुलाः नेपालभाषा संगीतिक ज्याझ्वः स्वयेत्यंगु धाःसा नेपालभाषा ख्यलय् हे थ्व न्हापांखुसी खः । ग्वसाः खलःया छम्ह दुजः नापं नेपालभाषाया नांजाःम्ह संगीतकार व म्येँ हालामि नील शाक्यया कथं थ्व इभेन्टय् मुक्कं झिंप्यपू म्येँ हायेकेगु योजना मध्ये न्हापांखुसी हे धइथें थुकी न्हय्पु नेपालभाषाया म्येँ व न्हय्पु खस् भाषाया म्येँ हायेकेत्यंगु दु ।

थुकिया मू कारण धइगु आः नेवाःत नेवाः समुदाय दुने जक लिकुना च्वनेगु मखसे नेपालभाषा ख्यःयात नं राष्ट्रिय व अन्तर्राष्ट्रिय ख्यलय् तकं थ्यंकेगु निंतिं जूगु खँ कलाकार शाक्यं ‘नेपालभाषा टाइम्स’यात कनादिल । नीगू लाख खर्च यानाः थःपिंसं उगु ज्याझ्वः ग्वसाः ग्वयाच्वनागु खँ न्ह्यथनादिसें आः उकियात परिपूर्ति यानाः नं नेवाः संगीत ख्यःया लागिं छगू अक्षयकोष खडा यायेगु मू उद्देश्य जूगु कारणं थःपिंसं उखें थुखें वनाः दुःख सियाच्वनागु नं बांलाःगु हे ज्याय् ई फ्यानाच्वनागु थें सन्तुष्टि जुयाच्वंगु खँ नं शाक्यं कनादिल

नेवाः कलाकारतय्त आपत विपतय् गुकथं ग्वाहालि यायेफइ धइगु विचारं हे थुकथंया ज्याझ्वः यायेगु सोच थःपिंके वःगु निर्देशक सुरेन्द्र तुलाधरया धारणा दु । वय्कःया हे नेतृत्वय् दुगु सुखावती मल्टी प्रोडक्सनं छगू लाख दां अक्षयकोषया लागिं तयाः ल्यं दुगु दां थज्याःगु हे थीथी ज्याझ्वःपाखें कोषय् मुंकेगु योजना दु । थ्व हे ज्याया शुरुवात यायेकथं थ्व इभेन्टया ज्या क्वचायेकेगु लक्ष्य तयातःगु दु ।

ज्याझ्वलय् नांजाःम्ह नेपालभाषाया म्येँ हालामिनापं हास्य कलाकार मदनकृष्ण श्रेष्ठया नं निपु प्यपु म्येँ नं दुथ्याइ धयाबलय् थुगु इभेन्ट छगू स्वये हे माःगु खँ टिकट न्याना काःपिं दर्शकतय्सं महसुस यानाच्वंगु दु । उकिसनं दिपा महर्जन थेंज्याःम्ह छम्ह सःया तःमि नांजाःम्ह म्येँ हालामिं नं न्हापांखुसी हे धइथें खस् भाषां नं म्यँे हालादीत्यंगु कारणं आः नेवाः ख्यःयात राष्ट्रिय व अन्तर्राष्ट्रिय लागाय् थ्यंकेगु ज्याय् सुं स्वयां म्हो मजुइगु खनेदु ।

सुखावती मल्टी प्रोडक्सनं आतक यानाच्वंगु थीथी ज्याझ्वः ताःलाक न्ह्यानाच्वंगुलिं हे थुगुसी न्याद्वः व स्वद्वः तका टिकट मू तयाः पाँचतारे होटेल याक एण्ड यतिइ दकलय् न्हापां थज्याःगु ज्याझ्वः ग्वसाः ग्वःगु खः । छुं ई न्ह्यः जक छम्ह विदेशी कलाकार वइगु धकाः ज्याझ्वः त्ययेकाः अन थ्यंकः मवःगु कारणं दरवारमार्गया होटेल बांमलाक तोडफोड जूगु घटनायात ध्यानय् तयाः माक्व व वइगु ग्यारेन्टी दुपिं जक कलाकारतय्गु नां ग्वसाः खलकं पित बियातःगु दु ।

उकी थःगु प्रस्तुति हे दइकथं हास्य कलाकार मदनकृष्ण श्रेष्ठ सहभागी जुयादी । अथेहे नांजाःम्ह गायिका दिपा महर्जनं मू कथं हे म्येँ न्ह्यब्वयादीगु जूगु दु । वय्कलं झिंप्यपू म्येँ न्ह्यब्वयादी । आतक दर्शकतय्सं टिकटया मू जक स्वयाच्वंगु दु ।

तर ज्याझ्वःया स्तरीयता (क्वालिटी) व स्तरीय ज्याझ्वः क्यनेफत धाःसा नापं डिनरया नं ब्यवस्था दु धाःगुलिं उकिं हे कःघाये फइकथंया साःसाःगु नसाज्वलं नं तये फत धाःसा नेवाः ख्यःयात अझ च्वन्ह्याकेत थज्याःगु ज्याझ्वलं अझ तिबः बीगु खँ ग्वसाः खलःया राजेश महर्जनं कनादिल ।

ज्याझ्वःया उलेज्या नेपाःया नांजाःपिं हास्य कलाकारद्वय मदनकृष्ण श्रेष्ठ व हरिवंश आचार्यपाखें मंकाः कथं जुइगु जुयाः नं थ्व ज्याझ्वलय् नेवाः समुदाय जक मखु गैर नेवाः समुदाय नं दर्शक कथं सहभागी जुइफइगु जूगु दु । उकिसनं ज्याझ्वलय् बछि धइथें म्यँे खस् भासं नं हायेकेगु ब्यवस्था यानातःगु दु ।

स्तरीय म्यँे व स्तरीय ब्यवस्थापन जुल धाःसा थज्याःगु ज्याझ्वलय् बिस्तारं बिस्तारं मनूतय्गु चिउताः व सहभागिता अप्वया वनीगु आशा ज्याझ्वःया छम्ह आकर्षण मू गायिका दिपा महर्जनया नं दु । नेवाः म्यँे थौं पाँचतारे होटेलय् प्रत्यक्षरुपं हे गायक गायिकापिंपाखें स्वये दइगु व न्यने नं दइगु जुयाः थुगु ज्याझ्वः छगू नेपालभाषा ख्यःया कोशल्वहं जुइफु ।