एन्जेलिनाया राजनीतिइ वयेगु संकेत
हलिउड अभिनेत्री एन्जेलिना जोली नं आः रंगीन संसारं तापाक्क च्वनाः राजनीतिइ दुहां वइगु जूगु दु । आः थथें एन्जेलिना राजनीतिइ वयेत्यंगु मखुसां उकिया संकेत धाःसा बी धुंकूगु दु । एन्जेलिनां आः नकतिनि ‘बीबीसी टुडे’ लिसे जूगु अन्तर्वार्ताय् थनिं २० दँ न्ह्यः राजनीतिइ दुहां वयेगु सम्भावनायात अस्वीकार यासें आः आवश्यक जुल धाःसा गुगुं नं इलय् थः राजनीतिइ सक्रिय जुइ फइगु संकेत बिउगु खः ।
संयुक्त राष्ट्र संघ शरणार्थी आयोगया सद्भावना दूत तकं जुयाच्वंह एन्जेलिनां वंगु शुक्रवाः बीबीसीया टुडेलिसे जूगु अन्तर्वार्ताया इलय् थः राजनीतिइ वयेगु संकेत बिउगु खः । आयोगया सद्भावना दूत एन्जेलिनां थौंकन्हय् शरणार्थीनापं यौन हिंसा, प्रकृति संरक्षणया मुद्दाय् नं प्रचारकया रुपय् ज्या याना वयाच्वंगु दु ।
बीबीसीया उगु ज्याझ्वःया संचालक जस्टिन वेबलिसें खँल्हाबल्हा यायेगु झ्वलय् एन्जेलिनां राजनीति, सामाजिक संजाल, यौन हिंसा व शरणार्थीया बारे विश्वय् ब्वलनाच्वंगु संकटयात कयाः खुलस्त रुपं थःगु खँ तःगु खः । खँल्हाबल्हाया इलय् ‘छि छु अमेरिकाया राष्ट्रपतिया निर्वाचन ल्वायेगु इच्छा यानादी ला ?’ धइगु न्ह्यसःया लिसलय् एन्जेलिनां तप्यंक राजनीतिइ वयेगु मधाःसां चाःहिकाः धाःगु खः कि ‘यदिं छिं थ्व न्ह्यसः जितः २० दँ न्ह्यः न्यनादीगु खःसा जितः तसकं न्हिले वइगु खइ, तर आः जिं न्ह्याबलें नं धायेगु यानाच्वना, गन जिगु आवश्यक जुइ, अने जि वने । यदि राजनीतिइ नं जि फिट जुइ धइगु खःसा जि अवश्य वनेगु जुइ ।’
एन्जेलिनां न्ह्यःने धाःगु दु, ‘जि सरकारलिसे ज्या यायेत समक्ष जू, सेनालिसे नं ज्या यायेत सक्षम जू । आःयात थुलि हे जक धाये थ्व स्वयां न्ह्यःने मेगु छुं नं नवाये मखु ।
LEAVE YOUR COMMENTS