सम्पदाया अभिलेखीकरण गुकथं यायेगु ?
यल (नेपालभाषा टाइम्स)÷ सम्पदा, द हेरिटेज व अक्षेश्वर परम्परागत बौद्ध कला कलेजया मंकाः ग्वसालय् ‘डकुमेन्टेशन ः कन्जरभेशन अफ आर्ट’ विषयक गोष्ठी अक्षेश्वर परम्परागत बौद्ध कला कलेजय् जुल ।
ज्याझ्वःया मू आज्जु, झीगु पुर्खापिंसं सृजना याना थकूगु कलाकृतिया महत्वयात उजागर यायेगु, वय्कःपिंसं त्वःता थकूगु ज्ञान, सीप, प्रविधियात भविष्यया पुस्ताया लागि ल्यंका थकेमाःगु खँय् जनचेतना थनेगु नापं थांैया कलाकारपिनिगु सृजनायात नं अभिलेखीकरण यानाः थःगु आधिकारिकता सुनिश्चित याना तयेमाःगु खँय् सचेत यायेगु खः ।
प्यंगू सेसनय् न्ह्याःगु उगु ज्याझ्वलय् संग्रहालयविद् शोभानानी शाक्य, उर्सुला मानन्धर, रजनी सिंख्वाल, सरोज महर्जन, ओमप्रकाश धिमिरे, सबिना तामाङ्ग व कलाकार निरञ्जन शाक्यपिंसं थीथी ज्यापौ न्ह्यब्वयादीगु खः । वय्कःपिंसं थःपिनि ज्यापतिइ पुरातात्विक दस्तावेज, कलाकृति, थ्यासफू आदि गुकथं सुरक्षित व संरक्षण याना तयेगु, स्यनावंगुयात गुकथं पुनःनिर्माण यायेगु, अभिलेख गुकथं तयार यायेगु नापं अभिलेखया सार्वजनिक महत्व व नीति निर्माण सम्बन्धि खँ न्ह्यब्वयादीगु खः ।
ज्याझ्वलय् उर्सुला मानन्धरं कला धइगु छगू अभिलेख सरह खः, झीगु जंक्व पौभाः छपाः स्वःसां नं उकी सुनां छाय् दयेकल, झीगु धर्म, संस्कृति, परम्परा आदिया बारे यक्व खँ दयाच्वनी धयादिल । अथे हे सबिना तामाङ्गं चित्तधर हृदय म्यूजियमय् अभिलेखीकरण यानाबलय्या थःगु अनुभव कनादिल । ज्याझ्वलय् मूपाहां संग्रहालय तथा पुरातत्व विभाग, लुम्बिनी विश्व विद्यालयया डा. सुरेश सुरस श्रेष्ठं टिप्पणी यानादीगु खः । ज्याझ्वलय् न्ववायेगु झ्वलय्
वय्कलं नेपाल मण्डलया बौद्धतय्
छेँय् छेँय्, बहाःबहिली छुं न छुं कथंया कलाकृति मदइ हे मखु, उकियागु अभिलेख याना तये फयेकेमाः धासें कलाकृति धइगु खुल्ला अभिलेख खःसां उकिया महत्वयात कयाः बाखं नं कने सयेकेमाः धयादिल ।
लुम्बिनी विकास कोषया सदस्य नापं अक्षेश्वर महाविहारया अध्यक्ष राजेश शाक्यं अक्षेश्वर परम्परागत बौद्ध कला कलेजया मू उदेश्य धइगु हे नेपाःया परम्परागत कलाया संरक्षण, सम्बर्धनया नापं थुकियात व्यवसायिक कथं नं आयआर्जनया श्रोत दयेकाः यंकेगु खः धयादिल ।
ज्याझ्वलय् थीथी बहाःबही व संघ संस्थाया प्रतिनधिनित्व दुगु खः ।
LEAVE YOUR COMMENTS