
एजेन्सी- लछि न्ह्यः लागू वासः छ्यःगु द्वपनय् ज्वंम्ह बलिउड अभिनेता शाहरूख खानया काय आर्यन खानयात अदालतं जमानत बिउगु दु । बिहीवाः बम्बइ हाइकोर्टय् जूगु सुनुवाइ लिपा आर्यनयात जमानत बिउगु खः । थ्वयां न्ह्यः मुम्बईया विशेष अदालतं आर्यनया जमानत अस्वीकार यानाः जेलय् छ्वयाबिउगु खः ।
आर्यनयात वंगु अक्टोवर २ कुन्हु मुम्बइया नार्कोटिक कन्ट्रोल ब्यूरों मुम्बइ नं गोवा वनाच्वंगु छगः क्रूज जहाजय् जुयाच्वंगुु रेब पार्टीइ छापामारे यानाः ज्वंगु खः । उबलय् वयापाखें लागू वासः बरामद मयाःसां वया पासा अरबाज मर्चेन्ट पाखें ६ ग्राम लागू वासः ज्वंगु खः । विशेष अदालतं आर्यनपाखें लागू वासः बरामद मजूसां थःपासाके लागू वासः दु धयागु जानकारी वयाके दुगु व निम्हं नापं दुगुलिं थुकियात थःगु जानकारीइ लागू वासः तयातःगु कथं माने यानाः जमानत बीत अस्वीकार याना वयाच्वंगु खः ।
मेखे आर्यनयात ज्वंम्ह भारतया नार्कोटिक्स कन्ट्रोल ब्यूरोया अधिकारी समीर वानखेडेयात हे मुम्बइ प्रहरीं ज्वनीगु आशंका ब्वलंगु दु । थःत प्रहरीं ज्वनीगु आशंका यासें वानखेडे स्वयं हे जुइफुगु गिरफ्तारी विरुद्ध अदालतय् वंगु दु ।
वानखेडे विरुद्ध प्यंगू अलग अलग मामिला दर्ता जुयाच्वंगु खँ महाराष्ट्र सरकारं अदालतयात जानकारी बिउगु दु । राज्य सरकारया वकिलं यदि वानखेडेयात ज्वनेगु आवश्यक जुल धाःसा थःपिंसं स्वन्हु न्ह्यव हे नोटिस बियाः ज्वनेगु खँ अदालतयात धाःगु दु ।
एनसीबीया जोनल डाइरेक्टर वानखेडेया हे टिमं लछि न्ह्यः २ अक्टोवरय् शाहरूख खानयाकाय आर्यन खानयात छगः क्रूजं लागू वासः छ्यःगु द्वपनय् ज्वंगु खः । आर्यनयात ज्वने धुंकाः वानखेडेयात कयाः थीथी विवाद पिहां वःगु खः । महाराष्ट्र सरकारया मन्त्री नवाब मलिकं वानखेडे व वया परिवारया निजी जानकारी नं सोसल मिडियाय् शेयर यानाः थीथी न्ह्यसः तया वयाच्वंगु दु ।
मेखे मुम्बइ प्रहरीं आर्यन खानयात ज्वंबलय्या प्रमुख साक्षी जुयाच्वंम्ह किरण गोसावीयात धाःसा ज्वनेधुंकूगु दु । पुणेया प्रहरी कमिश्नर अमिताभ गुप्तां गोसावीयात ठगी सम्बन्धी पुलांगु मामिलाय् न्यनेकने यायेत ज्वनागु खँ धाःगु दु ।
LEAVE YOUR COMMENTS