संघ व प्रदेश सासदलिसे देय् दबूया अन्तक्र्रिया
येँ(नेपालभाषा टाइम्स)÷नेवाः देय् दबू व नेवाः मिसा दबूया मंकाः ग्वसालय् संघ व प्रदेश सांसदलिसे भाषा, लिपि, संस्कृति उत्थानलिसें सांस्कृतिक संरक्षित क्षेत्रयात कयाः अन्तक्र्रियात्मक ज्याझ्वः जुल । कल्चरल सर्भाइभलया ग्वाहालिइ वंगु विहीवाः उगु ज्याझ्वः जूगु खः ।
ज्याझ्वलय् संघीय सांसद सुशिला श्रेष्ठं नेवाःत गन दु ? धकाः मालेमाःगु परिस्थिति वयाच्वंगु दु धासें नेवाःत थीथी राजनीतिक दलय् आवद्ध जुयाच्वंसां नं संस्कृति संरक्षणया सवालय् सकलें छथाय् हे छप्पँ जुयाः न्ह्याः वनेमाःगु आवश्यक दु धयादिल ।
मेम्ह संघीय सांसद ध्रुवबहादुर प्रधानं झी गुगु समुदायय् दु, अनया कला, संस्कृति, भाषा, सम्पदा संरक्षणलिसें समुदायया अधिकार स्थापना यायेत संघर्ष यायेमाःगु तसकं आवश्यक जूगु दु धयादिल । भाषा, कला, संस्कृति संरक्षणया सवालय् सम्झौत याये मजिउगु खँय् बः बियादिसें झीपिं नं भचा स्वार्थी जुयाः न्ह्याः वनेमाःगु व उकिया निंतिं दत्तचित्त जुयाः लगे जुइमाः धयादिल ।
बागमति प्रदेशया पुलांम्ह मुख्यमन्त्री अष्टलक्ष्मी शाक्यं सांस्कृतिक रुपान्तरण मयायेकं न्हूगु समाज निर्माण याये फइमखु धयादिल । सांस्कृतिक रुपान्तरणया खँ ल्हायेबलय् नेवाः समुदायया भाषा, कला, लिपि, संस्कृति लगायतया सकतां मूर्त, अमूर्त सम्पदात राष्ट्रिय सांस्कृतिक सम्पदा दयेकेमाःगु खँय् बः बियादिल ।
बागमति प्रदेशया सामाजिक विकास मन्त्री हरिप्रभा खड्गी श्रेष्ठं थः येँ महानगरया उपप्रमुख जुयाच्वनागु इलय् कला, संस्कृतिया निंतिं कयागु अडानयात लुमंकादिसें थःगु थासं फक्व ग्वाहालिलिसे सहकार्य यायेगु प्रतिवद्धता प्वंकादिल ।
प्रदेश सांसदलिसें पुलांम्ह मन्त्री गंगानारायण श्रेष्ठंं नेवाः समुदायया मूर्त, अमूर्त सांस्कृतिक सम्पदात लोपोन्मुख अवस्थाय् लानाच्वंगु खँय् चिउताः प्वंकादिल । लिसें वय्कलं बागमति प्रदेशय् नेपालभाषा व तामाङ्गभाषायात सरकारी कामकाजया भाय् घोषणा याकेत तसक्कं थाकुगु खँ कनादिसें कार्यान्वयन हयाः हे त्वःतागु व आः थुकियात निरन्तरता बीया निंतिं मदिक्क लगे जुयाच्वनेगु प्रतिबद्धता नं प्वंकादिल ।
बागमती प्रदेशया सांसदलिसें पुलांम्ह मन्त्री शैलेन्द्रमान बज्राचार्यं स्वनिगलय् गुलि नं सास्कृतिक धरोहरत दु, व दक्व रैथाने आदिवासीं नेवाःतय्सं यानाः हे जिवन्त जुयाच्वंगु खः धयादिल । गुथि जात्रापर्व हनेया लागि माःगु आर्थिक स्रोत मुनेत नं थाकुया वःगु कारणं मौलिक संस्कृति बुलुहुं लोप जुइगु अवस्थाय् थ्यंगु वय्कःया धापू दु ।
देय् दबूया सल्लाहकार डा.पुष्पराज राजकर्णिकारं झीगु मौलिक संस्कृतिइ वयाच्वंगु वैदेशिक जक मखु स्वदेशी संस्कृतिया नं हस्तक्षेप जुयाच्वंगु खँय् चिउताः प्वंकादिल । वय्कलं सांस्कृतिक क्षेत्र घोषणाया निंतिं स्थानीय गुथि, दाफालिसें खलः पुचःयात सक्रिय याना यंकेमाःगु खँय् बः बियादिल ।
ज्याझ्वलय् देय् दबूया न्वकु उमेश स्थापितं ‘सांस्कृतिक संरक्षण क्षेत्र, नेपालभाषा, नेपाललिपि र सांस्कृतिक पुनरुत्थान’ विषयय् ज्यापौ न्ह्यब्वयादिसें संविधानं हे बहुल जाति, बहुल भाषा, संस्कृतिया संरक्षण यायेमाःगु सुनिश्चित यानातःगु तर उकिया संरक्षण व संवद्र्धन यायेगु ज्या जुया मच्वंगु सन्दर्भय् राज्यया दायित्व छु धइगु न्ह्यसः चिं ब्वलनाच्वंगु दु धयादिल ।
देय् दबूया मेम्ह न्वकु रश्मिला प्रजापतिं लसकुस यानादिसें भाषा व संस्कृति हे थनया म्हसीका खः धासें समुदाय व जनप्रतिनिधिपिं मंकाःकथं सांस्कृतिक संरक्षित क्षेत्र, भाषा, लिपि पुनरुत्थानया निंतिं छप्पँ जुयाः वनेमाःगु विचाः तयादिल ।
देय् दबूया नायः पवित्र पवित्र वज्राचार्यं नेवाः सांसदतय्त थनया आदिवासी नेवाःतय् समस्याया बारे जानकारी दुसां राजनीतिक दलया दबावया कारणं नेवाःतय्सं थःतन दयेमाःगु अधिकार काये मफुगु खँ कनादिल । जनप्रतिनिधितय्सं थःगु समुदायया आवश्यकता थुइकाः सहकार्य याना वनेमाःगु खँय् नं वय्कलं बः बियादिल ।
LEAVE YOUR COMMENTS