प्रम विरुद्ध सतक व सर्वोच्च निथासं आन्दोलन

येँ (नेपालभाषा टाइम्स) – प्रधानमन्त्री केपी शर्मा ओलीं संसद विघटन याःगु विरुद्ध थौं प्रचण्ड-माधव पक्षीय नेकपां देय्न्यंकं प्रदर्शन याइगु जूगु दु । थौं येँय् जक झिगू थासं जुलुस पिहां वयाः भृकुटी मण्डपय् मुनेगु कथं ज्याझ्वः तयातःगु दु । थौं जुइगु प्रदर्शनय् नेकपाया शीर्ष नेतातय्सं सम्बोधन याइगु ज्याझ्वः दु । अथे हे थुकिया विरोधय् म्हिगः नेपाली कांग्रेसं देय्न्यंक विरोध ज्याझ्वः याःगु दु। म्हिगःया ज्याझ्वलय् कांग्रेसया सभापति शेरबहादुर देउवा, वरिष्ठ नेता रामचन्द्र पौडेल, नेता प्रकाशमान सिंह व पुलांम्ह मन्त्री गगन थापां सम्बोधन याःगु खः ।

थ्वहे झ्वलय् जनता समाजवादी पार्टीं निवाःयंकं विरोधया ज्याझ्वः घोषणा याःगु दु । जसपां वइगु माघ ७ गते हाकनं देय्न्यंकं प्रदर्शन यायेगु तयारी यानाच्वंगु दु । उकथं हे म्हिगः प्रम ओलीया विरुद्ध बृहत् नागरिक आन्दोलनं फिब्व ख्यलय् दम्फु थानाः प्रदर्शन याःगु दु। संसद पुनर्स्थपना यायेगु माग यासें थ्व स्वयां न्ह्यः वंगु शनिवाः शंख पुयाः प्रदर्शन याःगु खः । नागरिक आन्दोलनं पुस १५ गते धिमे थानाः प्रदर्शन याइसा १७ गते च्याम्ब्रुक थानाः प्रदर्शन याइगु ग्वसाः दु। उकथं हे १८ गते नाटक क्यनाः प्रम ओलीं ल्ह्वंगु पलाःया विरोध यायेगु ज्याझ्वः तयातःगु दु ।

थ्वहे झ्वलय् प्रम ओलीं याःगु मन्त्रिपरिषद् विस्तार विरुद्ध नं सर्वोच्च अदालतय् रिट लाःगु दु। अधिवक्तापिं लोकेन्द्र ओली, केशरजंग केसी व दिनेश लामिछानें कामचलाउ प्रधानमन्त्रीं याःगु मन्त्रिपरिषद् बदर यायेमाःगु माग यासें रिट दायर याःगु खः ।

‘प्रतिनिधिसभा दुजः मखुम्ह प्रधानमन्त्री व मन्त्री पद स्वतः रिक्त जुइ धकाः संविधानया धारा ७७ या उपधारा १ या (क) लय् व्यवस्था यानातःगु दु, प्रतिनिधिसभाया दुजः मखुम्ह व्यक्ति प्रधानमन्त्री व उम्ह हे प्रधानमन्त्रीं मन्त्रिपरिषद् विस्तार यायेगु संविधानया घोर उल्लंघन खः । थज्याःगु अवस्थाय् विपक्षीया नामय् संविधानया धारा १३३ या उपधारा २ व ३ बमोजिम रिट जारी जुइमाःगु खः कि मख ?’ रिटय् न्ह्यसः न्यनातःगु दु ।

काम चलाउ सरकारं संविधान स्वयां पिने वनाः याःगु राज्यकोषया दोहन जुइ कथं मिति २०७७ पुस १० गते याःगु मन्त्रिपरिषद् विस्तार बदर यायेमाःगु माग यासें उगु रिट दायर याःगु खः । प्रम ओलीं वंगु पुस १० गते गुम्ह मन्त्री थप यानाः मन्त्रिपरिषद् विस्तार याःगु खः । रिटयात कयाः कन्हय् पेशी तयातःगु दु ।

सम्बन्धित बुखँ

LEAVE YOUR COMMENTS