श्रीशान्तिघट संरक्षण समितिया न्हूधाः

येँ(नेपालभाषा टाइम्स)-थनया श्रीघःस्थित श्रीशान्तिघट चैत्य महाविहार संरक्षण समितिया च्याक्वःगु वार्षिक साधारणसभा वंगु शनिवाः जुल । श्रीघःया शाक्य सर्वसंघया महाविहारया साधारणसभां न्हूगु ज्यासना पुचःया नं ल्यज्या याःगु खः ।

समितिया नायः शुभकाजी शाक्यया सभापतित्वय् जूगु साधारण सभाय् येँ महानगरपालिका सम्पदा तथा पर्यटन विभाग प्रमुख अर्चना श्रेष्ठ शाक्य मूपाहांकथं झायादीगु खः । ज्याझ्वलय् समितिया छ्याञ्जे पुरण शाक्यं वार्षिक प्रगति विवरण व दांभरिं सर्वज्ञरत्न शाक्यं आर्थिक विवरण न्ह्यब्वयादीगु खः ।

ज्याझ्वःया निगूगु ब्वय् समितिया न्हूधाः याःगु खः । न्हूधाःकथं समितिया नायः पदय् हाकनं शुभकाजी शाक्ययात हे ल्यःगु दु । थुकथं हे कमलत्न शाक्य न्वकु, पुरण शाक्य छ्याञ्जे, रविन्द्र शाक्य दांभरिं अनिल शाक्य लिउ छ्याञ्जे व रसना शाक्ययात लिउ दांभरिं ल्यःगु दुसा दुजलय् सुरेशकाजी शाक्य, अष्टरत्न शाक्य, सुरेश शाक्य (पुतलीसतक), राजेश शाक्य व दिनेश शाक्य च्वनादीगु दु । वय्कःपिं सकलें सर्वसम्मतं ल्यःगु खः ।

उगु हे ज्याझ्वलय् श्रीघः शाक्य सर्वसंघपाखें गुंला लछियंकं तुतः पाठ यायेगु ज्या क्वचाःगु लसता हंगु खःसा सर्वसंघया एसइइ उत्तीर्ण विद्यार्थीपिंत थीथी सिरपाः लःल्हासे हनेज्या नं याःगु खः ।