थुकथं क्वचाल नेपालभाषा साहित्य नखः (किपा स्वयादिसँ )

येँ- नेपालभाषा टाइम्स न्हिपौया ग्वसालय् निक्वःगु नेपालभाषा साहित्य नखः–११३९ तःजिक क्वचाल । यलया भन्दाः क्यबय् जूगु साहित्य नखःया उलेज्या स्वनिगःया निगू महानगरपालिकाया मेयरं मंकाःकथं यानादीगु खः । येँ महानगरपालिकाया प्रमुख विद्यासुन्दर शाक्य व यल महानगरपालिकाया प्रमुख चिरिबाबु महर्जनं मंकाःकथं त्वाःदेवाय् मत च्याकाः साहित्य नखःया उलेज्या यानादीगु खः ।

नेपालभाषा टाइम्स न्हिपौ पिथना संस्था सन्ध्या टाइम्स पिथना प्रा.लिया नायः रमेशकाजी स्थापितया सभापतित्वय् जूगु ज्याझ्वलय् स्वंगू सपूm नं पितब्वज्या जूगु खः । नेपालभाषा बाखंच्वमि लिसें गजल च्वमि भूषणप्रसाद श्रेष्ठया ‘१०१ छन्द व १०१ गजल’, नियात्राकार राजेन मानन्धरया ‘हलहल बुंगद्यः’उपन्यासया विमोचन जनकवि दुर्गालाल श्रेष्ठं व वरिष्ठ समालोचकलिसें कोशकार इन्द्र मालीया ‘नेपालभाषाया यासुधुकू’ शताब्दीपुरुष सत्यमोहन जोशीं पितब्वज्या यानादीगु खः । न्हिछियंकं प्यंगू शेसनय् जूगु ज्याझ्वलय् पितब्वज्या जूगु सपूmतिइ च्वमिपिनिगु ल्हाःचिं तयेगु नं ज्या जूगु खः ।

उलेज्या लिपा निगूगु सेसनकथं ‘नेपालभाषा मञ्चन साहित्य’ व ‘नेपालभाषा सपूmया बजा व्यवस्थापन’ विषयय् अन्तरक्र्रिया जूगु खः ।
वयां लिपा मेगु सेसनय् नेपालभाषाया न्हूपिं व पुलांपिं साहित्यकारपिंसं चिनाखँ, बाखं व निबन्ध लगायत थःथःगु रचना पाठ यानादीगु खः । ज्याझ्वलय् भगतदास श्रेष्ठ, डा. पुष्पराज राजकर्णिकार, श्रीराम श्रेष्ठ, गोविन्दमान श्रेष्ठ, मोतिलक्ष्मी शाक्य, नारद वज्राचार्य, लोचनतारा तुलाधर, सुदन खुसः, हरिकृष्ण डंगोल, शशीकला मानन्धर, ईश्वरीमैयाँ श्रेष्ठ, पुष्करभक्त माथेमा, बद्री वेदना, नरेश अमात्य, अर्जुन नेपाःमि, नवीनप्रकाश श्रेष्ठ, राज अक्ष्योभ्य, रोनिका श्रेष्ठ, राकेश महर्जन लगायतं थःथःगु रचना पाठ यानादीगु खःसा दकलय् लिपा पद्मरत्न तुलाधरं च्वयादीगु ‘जातः गुरु’ व सुरेश किरणं च्वयादीगु ‘ओम नमः शिवायः’ नांया ख्यालः न्ह्यब्वयादीगु खःसा ज्याझ्वःया दथुइ नांजाःम्ह कलाकार महन्तलाल मल्लं स्टायण्डअप कमेडीया प्रस्तुति बियादीगु खः ।

अन्तरक्रियाय् ब्वति कयादीपिं, रचना पाठ यानादीपिं व ख्यालः म्हितादीपिं कलाकारपिंत पाहांपिं भाषाह्यःमि निरञ्जनरत्न शाक्य, महर्जन विजनेश एशोसियट्सया कृष्णलाल महर्जन, किपू नगरपालिकाया प्रमुख रमेश महर्जनपिंसं मतिनाया चिं लःल्हानादीगु खः । नेपालभाषाया थीथी प्रकाशन संस्थापाखें सपूmया स्टल व नसाज्वलंया स्टल नं दुगु थुगु साहित्य नखः नेपालभाषा न्हिपौया ग्वसालय् जूगु निक्वःगु संस्करण खः । ज्याझ्वलय् आपालं साहित्यकार व भाषाह्यमिपिनिगु उपस्थिति दुगु खः ।

नेपालभाषा टाइम्स

च्वमिया मेमेगु

• निम्ह साहित्यकारया थौं बिचाः मुँज्या
• एमालेया संकल्प यात्रायात पहिचानवादीया हाथ्या
• शरणार्थी काण्डय् गुम्हेसित कुना हे तइगु
• भाषा विधेयक राजपत्रय् पिहां वल
• रुसी सेनाय् नेपाःमि बारे अध्ययन समिति