संघ सरकार खनाः प्रदेश तम्वल

येँ – धाकुफसं विनाश याःगु बारा व पर्साय् सरकारपाखें न्ह्याकाच्वंगु राहत प्रयाप्त मजूगुलिं स्थानीय जनता सरकार खनाः तम्वःगु दु । अझ प्रदेश नं. २ या सरकार तकं संघीय सरकारया ज्या खनाः तम्वयाच्वंगु दु । पीडित लागाय् प्रधानमन्त्री विमानपाखें चाःहिउ वःसां राहतया छुं प्याकेज धाःसा घोषणा मयाःगुलिं प्रदेश २ या मन्त्रीत तम्वःगु खः । थ्वया हे दथुइ संघीय सरकारं निगुलिं जिल्लाया पीडिततय् लागिं ५०० पाः त्रिपाल छ्वया बिउगु दु ।

उगु लागाय् ५०० गू परिवारया विचल्ली जुल धाःगुलिं ५०० पाः जक त्रिपाल छ्वयागु खँ धाःगु दु । तर उलि जक त्रिपालं गाइगु धाःसा खने मदु धाःगु दु । अस्पतालय् लाःपिं व मेपिं घाःपाः जूपिं नं ज्यान बचे जूसां आः थःपिं गन च्वं वनेगु धकाः चिन्तित जुयाच्वंगु दु । घाःपाः जूपिं अप्वःसिया छेँ समेत पुइका यंकूगु जुयाः उपिं च्वनेगु थाय् तकं मदयाच्वंगु दु । उकिं उमिगु लागिं आवासया व्यवस्था सरकारं याना बी मालीगु खँ धाःगु दु ।

थ्वहे झ्वलय् सत्तारुढ पार्टी नेकपा लिसें प्रमुख प्रतिपक्षी नेपाली कांग्रेसं थः कार्यकर्तातय्त राहत व उद्धारया ज्याय् खटे जू हुँ धकाः निर्देशन बिउगु दु । प्रदेश २ या सरकारं नं पीडितपिंत नगद राहत बीगु धकाः घोषणा याःगु दु । अथे हे मेमेगु पार्टी व स्थानीय गैरसरकारी संस्थात नं राहतया सामान ज्वनाः प्रभावित क्षेत्रय् खटे जुयाच्वंगु दु । उमिसं आः तत्कालया लागिं छेँ मदयेकाः च्वनेमाःपिंत आवासया व्यवस्था यायेगुपाखे निं प्राथमिक बियाः ज्या शुरु यायेगु खँ धाःगु दु ।