खुसि सिथया जग्गाय् मापदण्डया फैसला ःसरकारं पुनरावेदन तइगु
येँ (नेपालभाषा टाइम्स)- सरकारं खुसि सिथय् थप २० मिटर क्षेत्रय् गुगुं नं कथंया संरचना दयेके मदइगु सर्वोच्च अदालतया परमादेश विरुद्ध पुनरावलोकन याइगु जूगु दु । उकिया नितिं छुं न्हिया दुने हे निवेदन दर्ता जुइगु खँ महान्यायाधिवक्ताया कार्यालयं धाःगु दु ।
जग्गाया मापदण्ड सम्बन्धी फैसला कार्यान्वयन याये मफइगु निष्कर्ष सहित सरकार पुनरावलोकनय् वनेत्यंगु खः । वंगु पुस ३ गते सर्वोच्च अदालतया न्यायाधीशपिं डा. आनन्दमोहन भट्टराई व विनोद शर्माया मंकाः इजलासं सुकुम्बासी व खुसि सिथय् अतिक्रमण बारे उगु फैसला याःगु खः । उकिया पूर्ण पाठ वंगु साउन महिनाय् सार्वजनिक याःगु खः । फैसलाया पूर्णपाठ सार्वजनिक जुइधुंकाः सरकारयात दबाब अप्वया वंगु खः । सर्वोच्चया फैसला कार्यान्वयन यायेगु खःसा स्वनिगलय् आपालं बस्ती थुनेमालीगु, खुसि सिथया संरचना खाली यायेमालीगु व सांस्कृतिक सम्पदाय् तकं लिच्वः लाइगु धासें कार्यान्वयन याये मफइगु निष्कर्ष सहित पुनरावलोकनय् वनेगु निर्णय सरकारं याःगु खः ।
स्वनिगःया खुसिइ जुयाच्वंगु प्रदूषण नियन्त्रण, खुसि सिथय् जग्गाया अतिक्रमण चीकेगु सम्बन्धय् ज्या यायेगु निंतिं महानगरपालिका सहित सम्बन्धित नगरपालिकायात सर्वोच्च अदालतं परमादेश जारी याःगु खः ।
सरकारं २० मिटर दुनेया आपालं धइथें थासय् व्यक्तिगत जग्गा धकाः जग्गाधनी पूर्जा कयातःगु व छेँ तकं दयेकाः च्वनाच्वंगु अवस्थाय् थुनेगु सम्भव मदुगु व क्षतिपूर्ति नं बी मफइगु तर्क सरकारं याःगु दु । सर्वोच्च अदालतं हे थ्व स्वयां न्ह्यः व्यक्तिगत पूर्जा दुपिनिगु छेँ राज्यं थुनेगु खःसा अनिवार्य रुपय् क्षतिपूर्ति बीमाः धाःगुलिं नं राज्यकोषं उगु आर्थिक भार फये मफइगु तर्क सरकारं याःगु दु ।
उकथं हे सरकारं खुसि सिथय् २० मिटरया सीमा क्वःछिनाः संरचना चीकाः पार्क दयेकेगु खःसा आपालं धइथें देगः व धार्मिकस्थल थुने मालीगु दाबी नं याःगु दु । सरकारया कथं पशुपतिनाथया देगःनिसें गोकर्णेश्वर महादेव थेंज्याःगु आपालं धार्मिक महत्वया सम्पदा खुसि सिथय् लाःगुलिं अज्याःगु संरचना थुने फइ मखु धासें फैसला कार्यान्वयन याये मफइगु तर्क सरकारं याःगु दु । सर्वोच्च अदालतं याःगु उगु फैसलाय् हे खुसि व खुसिया सहज प्रवाहया नितिं माःगु जग्गा कानुन कथं क्षतिपूर्ति बियाः काये फइ धाःगुलिं थ्व आर्थिक रुपय् सहज मजूगु तर्क नं सरकारं याःगु दु ।
LEAVE YOUR COMMENTS