ने. सं. ११४४ ञलाथ्व पुन्हि - येँया: पुन्हि

भारतया ‘साकेत नगर’ यात नेपाःया बौद्धतय् समर्थन

येँ (नेपालभाषा टाइम्स) – भारतया अयोध्याय् राम मन्दिर दयेकेगु खः कि बाबरी मस्जिद दयेकेगु खः धकाः विवाद जुयाच्वंगु जग्गा वास्तवय् बुद्ध धर्मलिसे स्वापू दुगु साकेत नगर खः धइगु ऐतिहासिक प्रमाण लुया वयेवं वहे कायम जुइमाः धकाः संघर्ष यानाच्वंपिं भारतीय बौद्ध समुदाययात नेपाःया बौद्धमार्गीतय्सं नं समर्थन याःगु दु ।

अयोध्याया उगु विवादास्पद जग्गाय् उत्खनन् याना स्वःबलय् अन बुद्ध धर्मलिसे स्वापू दुगु अवशेषत लुया वःगु खःसा इतिहासय् नं उगु थाय् साकेत नगर खः धकाः उल्लेख जुयाच्वंगु खने दयेवं अन बौद्ध तीर्थ हे स्थापना यायेमाः धइगु माग यासें भारतया बौद्ध भिक्षुतय्सं अनसन समेत शुरु याःगु दुसा डा. बाबा राव अम्बेडकरया शिष्यतय्सं नं अन बौद्धस्थल हे कायम यायेमाः धासें आन्दोलन याना वयाच्वंगु दु। उमिगु थ्वहे आन्दोलनयात समर्थन यासें थौं नेपाःया बौद्धमार्गीतय्सं लैनचौरस्थित भारतीय राजदूतावासया पिने धर्ना च्वँसें ज्ञापनपौ लःल्हायेगु ज्याझ्वः दयेकूगु दु ।

नेवाः लगायत तामाङ, गुरुङ, मगर जनजातिलिसे आवद्ध बौद्ध संघसंस्थात जानाः गठन याःगु ‘साकेत नगर सरोकार समूह’ पाखें थौं सुथय् ११ बजे भारतीय राजदूतावासया पिने धर्ना च्वनेगु ज्याझ्वः दयेकूगु खः । उगु मौन धर्नाय् थीथी ब्यानर ब्वयेगु व लिपा दूतावासयात छगू ज्ञापनपौ बीगु ज्याझ्वः दयेकूगु दु ।

अयोध्याया उगु थासय् मुस्मांतय्गु बाबरी मस्जिद दयेकातःगु खःसा भारतीय जनता पार्टी समर्थक कार्यकर्तातय्सं उगु थासय् मस्जिद मखु न्हापा ला राम मन्दिर दयेकातःगु खः धासें मस्जिद थुना बिउगु खः । लिपा अदालतं अन न्हापा मन्दिर हे दुगु खः धासें अन आः मन्दिर दयेकेगु व मस्जिद दयेकेगु लागिं अन हे भचा उज्यां जग्गा बीगु धकाः फैसला न्यंकूगु खः ।

तर म्हुया स्वःबलय् अन मन्दिर व मस्जिद सिबें नं पुलांगु बौद्धस्मारकया अवशेषत लुया वयेवं भारतीय पुरातत्वविद्तय्सं समेत थुकिया संरक्षण यायेमाः धकाः सः तयाहःगु दु। तर भारत सरकारं धाःसा उकियात वास्ता यानाच्वंगु मदु ।