कोरोना भाइरस : नेपालय् आः तक २ लख परीक्षण

येँ – नेपालय् आः तक कोरोना भाइरसया निंतिं २ लख नमुना परीक्षण जूगु दु । पीसीआर व आरडीटी विधिपाखें आः तक नेपालय् २ लख ६ सय ४६ नमुना परीक्षण जुइधुंकूगु जानकारी स्वास्थ्य तथा जनसंख्या मन्त्रालयं बिउगु दु ।

परीक्षण जूगु नमुना मध्ये ८० हजार २ सय ६७ पीसीआर विधिपाखें खःसा १ लख २० हजार ३ सय ७९ परीक्षण आरडीटीपाखें खः । लिप्पांगु नीप्यघौया दुने ४ हजार ९ सय २४ पीसीआर विधिपाखें व ४ हजार ३४ नमुना आरडीटी विधिपाखें परीक्षण जूगु खः ।

प्रादेशिक रुपं दकलय् अप्व प्रदेश नम्बर ५य् आरडीटी परीक्षण जूगु दु । अन २६ हजार ७ सय ४४ नमुना परीक्षण जूगु दु । अथेहे प्रदेश नम्बर १य् १२ हजार ६ सय ४२, प्रदेश नम्बर २लय् ७ हजार ३ सय ३१, बागमति प्रदेशय् २५ हजार ९ सय ३३, गण्डकी प्रदेशय् ९ हजार १ सय ५१, कर्णाली प्रदेशय् १४ हजार ८ सय ४५ व सूदुरपश्चिम प्रदेशय् २३ हजार ७ सय ३३ नमुना परीक्षण जूगु खः ।

माघ ९ गते नेपालय् कोरोनाया संक्रमणया न्हापांगु केस खंगु इलय् तक थन परीक्षण यायेगु सुविधा मदु । तर छुं ई लिपा परीक्षण यायेगु व्यवस्था याःगु नेपालय् आः न्हय्गूलिं प्रदेशया २०गू प्रयोगशालां न्हिया न्हिथं परीक्षण जुयाच्वंगु दु ।