नेपालभाषा स्टार म्युजिक भिडियो अवार्डया ल्याः अप्वयेकीगु

ख्वप(नेपालभाषा टाइम्स)÷संसार क्रियसन्सया ग्वसालय् छुं ई न्ह्यः जूगु निक्वःगु नेपालभाषा स्टार म्युजिक अवार्डया औपचारिक समापन याःगु दु । थन जूगु छगू ज्याझ्वलय् निक्वःगु संस्करणया अवार्ड ज्याझ्वलय् अवार्ड त्याकादीपिं व ज्याझ्वःयात थीथीकथं ग्वाहालि यानादीपिंत सुभाय् देछासे औपचारिक रुपं ज्याझ्वः क्वचायेकूगु खः ।

थनया यो यो ब्यांक्वेटय् वंगु शुक्रवाः जूगु ज्याझ्वलय् नवासें क्रियसन्सया प्रमुखनापं नांजाःम्ह कलाकार स्वतन्त्र संसार महर्जनं अवार्डयात मतिना यानादीपिं सकसितं सुभाय् देछासे थुकथंया हे हःपाः तिबः दया वन धाःसा स्वंगूगु संस्करणय् अवार्डया विधा अप्वयेकेगु प्रतिवद्धता प्वंकादिल । दकलय् ताःहाकःगु व दकलय् अप्वः विधाय् लःल्हाइगु अवार्डया रुपय् दावी याना वयाच्वंगु थुगु अवार्डया ज्याझ्वःया विश्व रकेर्ड कायम यायेगु निंतिं अवार्डया विधा अप्वयेकेगु प्रतिवद्धता वय्कलं प्वंकादिल ।

ग्वसाः खलःपाखें अवार्ड विजेता, सम्मानित व्यक्तित्वपिंत ग्वसाः खलः संसार क्रियसन्सपाखें दसिपौ व आरबि फिल्म्सपाखें भिंतुना पौ देछाःगु खः । निगुलिं संस्थाया सल्लाहकार जुया च्वनादीम्ह सिने पत्रकार विजयरत्न असंबरें दसिपौ लःल्हानादीगु खः । उगु इलय् भक्तपुर इन्टरनेशनल हस्पिटलया उपाध्यक्ष अशोककुमार श्रेष्ठं आरबि फिल्म्सयात भिंतु्ना पौ लःल्हानादीगु खः ।

आरबि फिल्म्सया प्रबन्ध निर्देशक रविन्द्र शाहीं लसकुस यानादीगु ज्याझ्वलय् वरिष्ठ सिने पत्रकार असंबरें नेपाल टेलिभिजनय् नेपालभाषां ज्याझ्वः न्ह्याकागु ईया लुमन्ति कनादीगु खः ।