लाल प्रतिवेदन छाय् लिबाःगु ?

येँ – राष्ट्रिय जनता पार्टी नेपालया नेता महन्थ ठाकुरं तराई–मधेशय् जूगु आन्दोलनया सम्बन्धय् छानविन यायेत नीस्वंगु लाल आयोगया प्रतिवेदन सार्वजनिक यायेत सरकार समक्ष माग यानादीगु दु । म्हिगः प्रतिनिधिसभा बैठकय् न्ववायेगु झ्वलय् वय्कलं पुलांम्ह न्यायाधीश गिरीशचन्द लालया संयोजकत्वय् नीस्वंगु आयोगया प्रतिवेदन सार्वजनिक यायेत माग यानादीगु खः ।

वय्कलं सभामुखया निर्देशन व सांसदया आग्रह लिपा सरकारं लाल प्रतिवेदन सार्वजनिक यायेगु जुइ धकाः आश्वासन बिउसां नं छाय् लिबाकाच्वना धकाः न्ह्यसः थनादीगु खः । बैठकय् संघीय समाजवादी फोरम नेपालया सहअध्यक्ष राजेन्द्र श्रेष्ठं नं लाल आयोगया प्रतिवेदन सार्वजनिक यायेमाःगु माग यानादिल ।

लिसें वय्कलं सरकारं सहमति कथं ज्या मयात धाःसा थःगु पार्टी व सरकारया दथुइ जुयाच्वंगु सहकार्य त्वाः दले फइगु ख्याच्वः नं बियादिल । वय्कलं संविधान लिसे बाँझे जुयाच्वंगु कानून सदनं पारित जुयाच्वंगु दु धासें तत्काल संविधान लिसे बाँझे जुयाच्वंगु कानूनत खारेज यायेत नं माग यानादिल । टिकापुर घटना लिपा स्थानीय थारूतय्त जूगु दमनया खँ समेत लाल प्रतिवेदनय् दुथ्याःगु जुयाः सरकारं उकियात सार्वजनिक मयाःगु द्वपं दु ।

सम्बन्धित बुखँ

LEAVE YOUR COMMENTS