पुलांगु ल्वाभः लित बीत आह्वान

येँ – नेत्र विक्रम चन्द ‘विप्लव’ पुचलं म्हिगः याःगु नेपाल बन्द आंशिक जक सफल जूगु दुसा बन्दया झ्वलय् थाय्थासय् बम तःगु लूगु दु ।
बन्दं यानाः येँय् रुटया गाडी चले मजूसां छुं भचा निजी गाडी धाःसा चले जुल । येँ लिसें देय्न्यंकंया कलेज, स्कुल व औद्योगिक प्रतिष्ठानत बन्द जुल ।

थ्व झ्वलय् म्हिगः पोखराया सभागृह चोक, बुटवलया सिद्धार्थ कालिकानगर, उदयपुरया कटारीइ सुतली बम लूगु दु । अथेहे नवलपरासीया जिल्ला प्रहरी कार्यालय न्ह्यःने बम मुइकूगु दु । मेखे सरकारं विप्लवयात लक्षित यासें सर्वसाधारण जनतायाके दुगु अवैध ल्वाभः सरकारयात लःल्हायेहजि धकाः आह्वान याःगु दु ।

मंगलवाः च्वंगु मन्त्रिपषिद्या बैठकं थ्व आह्वान याःगु जानकारी सरकारया प्रवक्ता लिसें सञ्चार तथा सूचना मन्त्री गोकुल बास्कोटां म्हिगः याःगु नियमित पत्रकार सम्मेलनय् बियादीगु खः ।मन्त्री बास्कोटां सुं नं मनूयाके छुं नं कथंया स्वचालित ल्वाभः, भरुवा बन्दुक, कटुवा पेस्तोल लिसें विष्फोटक पदार्थ दुसा लिकसं लाःगु प्रहरी, सेना वा शसस्त्र प्रहरीत लःल्हायेत इनाप यानादीगु खः ।

उगु ल्वाभः लः ल्हायेत सरकारं सुइन्यान्हुया ई नं बिउगु दु । थुगु ईया दुने थःपिंके दुगु अवैध ल्वाभः लः ल्हात धाःसा हतियार तयातःगु वापत जुइगु सजायँ मिनाहा जुइगु खँ नं वय्कलं कनादिल ।

माओवादी जनयुद्धया झ्वलय् सेना व प्रहरीपाखें लाकायंकूगु आपालं ल्वाभः अझ नं विप्लव पुचःयाके दनगिु विश्लेषण सुरक्षा निकायं यानाच्वंगु दु । वंगु फागुन २४ गते कपिलवस्तुया शिवराज नगरपालिकास्थित विप्लवया गामय् छापा मारे यानाः प्रहरीं आपालं अत्याधुनिक ल्वाभःत बरामद याःगु खः ।

सम्बन्धित बुखँ

LEAVE YOUR COMMENTS