कित्ताकाटं दलालयात राहत

सर्वसाधारणयात धाःसा घूस नके मालीगु अवस्था
येँ – भूमि व्यवस्था, सहकारी तथा गरिबी निवारण मन्त्रालयं जग्गाया कित्ताकाट फुकुवा याःसां थुकिं सर्वसाधारण जनतायात धाःसा झन समस्याय् लाकीगु खँ सीदुुगु दु । शुक्रवाः सार्वजनिक याःगु निर्देशनं कृषियोग्य भूमि सम्बन्धी थीथी बुँदां सर्वसाधारण जनताया समस्या समाधान मजुइगु खँ सम्बन्धित मनूतय्सं धाःगु दु ।

आःया व्यवस्थां जग्गा प्लटिङ याइपिंत धाःसा फाइदा जूसां सर्वसाधारण जनताया समस्या धाःसा न्हापा गथे खः अथे हे तुं जुयाच्वंगु दु ।
निर्देशनया स्वंगूगु बुँदाय् ‘फिल्ड बुकय् शहरी क्षेत्रया किसिम ‘क’ निसें ‘ङ’ तक कामय जूगु वा बसोबास लिसें व्यावसायिक क्षेत्र किसिम जने यानातःगु वा फिल्डबुक स्रेस्ताय् न्ह्यागु च्वयातःसां स्थानीय तहपाखें खेतीयोग्य जग्गा मखु धकाः व्यहोरा च्वयाहल धाःसा प्रचलित कानून बमोजिम खण्डीकरण वा कित्ताकाट यायेफइ धयातःगु दु ।

तर न्यागूगु बुँदाय् स्थानीय तहं मखुसें उगु तहया मातहत च्वनीगु जग्गा उपयोगिता विश्लेषण प्राविधिक समितिं सिफारिस यायेगु व थुगु समितिं इजाजत प्राप्त जग्गा विकास याइगु फर्म, संस्था वा कम्पनीयात सिफारिस यायेगु च्वयातःगु दु । थुकिं सर्वसाधारण जनतां थःगु छेँ व्यवहार चले यायेत जग्गा कुचा थलाः मीमाल धाःसा दकलय् न्हापां रियल स्टेट कम्पनी दर्ता यायेमालीगु खँ धाःगु दु ।

मन्त्रालयया थज्याःगु निर्देशनं नागरिकया मौलिक हक उल्लंघन जुइगु खँ धाःगु दु । लिसें न्हापा जग्गा कित्ताकाट यायेत न्हापा मालपोतया कर्मचारीयात घूस बीमाःगु खःसा आः स्थानीय जनप्रतिनिधियात घूस बीमालीगु अवस्था ब्वलनीगु खँ नं धाःगु दु । मन्त्रालयया निर्देशनय् संविधानया धारा २५ स प्रत्येक नागरिकयात कानूनया अधिनय् च्वनाः चल अचल सम्पत्ति आर्जन यायेगु न्याये–मी यायेगु अधिकार प्रत्याभूत यानातःगु अधिकारपाखें बञ्चित जुइगु खँ धाःगु दु ।

मन्त्रालयया निर्देशनय् कथं जग्गा उपयोगिता विश्लेषण प्राविधिक समिति गठन यायेमाःगु खँ धयातःगु दु । प्राविधिक समिति कृषि, वन, नापी, जग्गा प्रशासन व शहरी विकास सम्बन्धी प्राविधिक च्वनेमाःगु व्यवस्था यानातःगु दुसा ७५३ निकायय् अज्याःपिं प्राविधिक तकं मदुुगुलिं यानाः थ्व निर्णय कार्यान्वयन यायेगु ज्या तकं जटिल जुइगु अवस्था ब्वलंगु दु ।

थुगु निकाय मध्ये छगू निकायया प्राविधिक मदयेवं समिति गठन यायेत तकं थाकुइगु खँ सीदु । सर्वसाधारण जनताया समस्या संवोधन यायेगु धकाः मन्त्रालयं आः हःगु व्यवस्थां जनतायात झन जक अन्यौलय् लाकीगु सम्भावना अप्वया वनाच्वंगु दु । सरकारया निर्णय लिपा जग्गा व्यवसायीत धाःसा लय्ताःगु दु । थ्व फुकुवाया लागिं उमिसं हे अप्वः सः तया वयाच्वंगु खः ।