राष्ट्रिय उपभोक्ता मंचपाखें ध्यानाकर्षण
येँ- राष्ट्रिय उपभोक्ता मंचं बजारय् कोरोना भाइरस (कोभिड–१९) विरुद्धया खोप अवैध रुपं विक्री वितरण जुयाच्वंगु धासें थःपिनिगु ध्यानाकर्षण जूगु खँ धाःगु दु ।
मंचया अध्यक्ष प्रेमलाल महर्जनं छगू विज्ञप्ती जारी यासें न्हापांगु मात्राया खोप कायेधुंकूपिंसं निगूगु मात्राया खोप काये मखनाच्वंगु व बहुसंख्यक नेपाःमित अझ नं खोप कायेगुपाखें बञ्चित जुयाच्वंगु इलय् अवैध रुपं खोप हयाः विक्री वितरण यानाच्वंगु धासें मंचपाखें सम्बन्धित निकायया ध्यानाकर्षण यानाच्वना धयातःगु दु ।
मंचपाखे जारी विज्ञप्ततीइ जनस्वास्थ्यय् हे खेलवाड यायेगु ल्याखं भ्रष्ट मनस्थिति दुपिंसं नेपाःया पूर्वी नाकापाखें स्वनिगः लगायत थीथी शहरी क्षेत्रय् अवैध रुपं कोभिसिल्ड खोप हयाः स्वद्वःनिसें न्याद्वः तका दामं मियाच्वंगु धइगु गोप्य सुचं मंचयात प्राप्त जूगु धासें सम्बन्धित निकायया ध्यानाकर्षण यानाच्वना धयातःगु दु ।
छखे कोभिसिल्डया न्हापांगु मात्राया खोप कायेधुंकूपिं नागरिकं इलय् निगूगु मात्राया खोप काये मखनाः तसकं हतोत्साहित व निराश जुयाच्वंगु इलय् मेखे सरकारी निकायपाखें हे खोप गायब यायेगु ज्या जुयाच्वन धइगु अजू चायापुगु समाचार वयाच्वंगु उकिसनं व्यापारिक क्रियाकलाप याइपिं व जनस्वास्थयय् हे खेलवाड याइपिंसं उकथं अवैध रुपं खोप मियाच्वंपिंत कडा कारवाही यायेत नं मंच माग याःगु दु ।
सरकारी संयन्त्रपाखें हे खोप गायब जूगु समाचार व भारतया बंगालपाखें नक्कलि कोभिसिल्ड खोप बजार बिक्री वितरण जुयाच्वन धइगु समाचार स्वयेबलय् थुकी सरकारं सक्रियता क्यना मच्वंगु व सजगता नं क्यनाच्वंगु मदु धइगु पुष्टि जूगु मंचं धाःगु दु ।
थज्याःगु गलत व गम्भिर प्रकृतिया क्रियाकलाप याइपिं व थुकी संलग्न जूपिंत सम्बन्धित निकायपाखें उचित अनुगमन, अध्ययन व छानविन यायेत नेपाल सरकारया ध्यानाकर्षण यासें अनुचित व्यापारिक क्रियाकलाप याइपिं व जनस्वास्थ्यय् खेलवाड याइपिंत कडा स्वयां कडा कारवाही यायेत मंच माग याःगु दु ।
LEAVE YOUR COMMENTS