सरकारपाखें ‘स्मार्ट लकडाउन’
येँ – स्वनिगःया स्वंगुलिं जिल्ला प्रशासन ज्याकुथिं नीन्याम्ह स्वयां अप्वः मनू मुनाः भेला याये मदइगु सुचं पित बिउगु दु । उकथं हे राजनीतिक दलया सभा सम्मेलन नापं अप्वः भिडभाड जुइगु फुक्कं कथंया गतिविधिइ नं बन्देज तयाबिउगु दु । म्हिगः चान्हय् १२ बजेंनिसें उगु नियम लागू जुइगु खँ जिल्ला प्रशासन ज्याकू येँनं जारी याःगु विज्ञप्तिइ धयातःगु दु । नापं सार्वजनिक थासय् मास्क अनिवार्य तयेमाःगु, साब्वनं ल्हाः सिलेगु अनिवार्य याकेगु खँ न्ह्यथनातःगु दु ।
उकथं हे माघ ७ गतेनिसें जिल्ला दुनेया फुक्कं कथंया सार्वजनिक सेवा कायेत खोप कार्ड अनिवार्य क्यनेमाःगु याःगु दु । अथे हे जिल्ला प्रशासनं सार्वजनिक सवारी साधनय् निश्चित सिट क्षमता स्वयां अप्वः यात्रु तये मदइगु निर्णय नं याःगु दु । उद्योग व्यवसायय् ज्या याइपिं मजदुरतय्त जनस्वास्थया मापडण्द अनिवार्य याःगु दु ।
थ्वहे झ्वलय् म्हिगः जक देय्न्यंकं २,४४४ म्ह कोरोना संक्रमित जूगु दु । स्वास्थ्य तथा जनसंख्या मन्त्रालयया कथं पीसीआर व एन्टिजेन विधिं १५०३३ म्हेसित परीक्षण याःगुली २४४४ म्हेसित संक्रमित पुष्टि जूगु दु ।
१०,६४८ म्हेसिया पीसीआर परीक्षणय् १,९१८ म्ह संक्रमित जूगु खःसा ४,३८५ म्हेसिया एन्टिजेन परीक्षण जूगुलिं ४६३ म्ह संक्रमित पुष्टि जूगु खः । उकथं हे ३१३ म्ह संक्रमित मुक्त जूगु खः । म्हिगः तक नेपालय् कोरोना संक्रमितया मुक्कं ल्याः ९ लाख ३३ हजार ८९४ म्ह थ्यंगु दुसा सीपिनिगु ल्याः ११ हजार ६०७ थ्यंगु दु । ८ लाख १४,७९८ म्ह संक्रमणं मुक्त जूगु दु ।
मन्त्रालयया कथं थौंकन्हय् देय्न्यंकं सक्रिय संक्रमितया ल्याः ९५२२ म्ह दु । उकी मध्ये ८८६७ म्ह होम आइसोलेसनय् च्वनाच्वंगु दुसा संस्थागत आइसोलेसनय् ६५५ म्ह च्वनाच्वंगु दु । संक्रमित मध्ये ९३ म्ह आइसीयू व १९ म्ह भेन्टिलेटरय् तयातःगु दु ।
स्वनिगलय् दकलय् अप्वः
म्हिगः स्वनिगलय् जक १२८६ म्ह कोरोना संक्रमित थपे जूगु दु । मन्त्रालयया कथं येँय् ९८०, यलय् २२१ व ख्वपय् ८५ म्ह संक्रमण लूगु खः । कोरोनाया संक्रमण अप्वया वनेवं स्वनिगःया थीथी थासय् खोप काइपिनिगु भिड अप्वःगु दु । विशेष यानाः स्वनिगः कोरोनाया रेड जोन जुयाच्वंगुलिं खोप काइपिनिगु भिड अप्वःगु खः ।
कोरोना संक्रमण अप्वयेवं सरकारं सार्वजनिक थासय् (होटल, सिनेमा हल, रेष्टुरेन्ट, पार्किङ) खोपया कार्ड क्यनाः जक दुहां वने दइगु नियम हयेवं खोप काइपिं अप्वःगु खः ।
LEAVE YOUR COMMENTS