थप ६म्हेसित कोरोनाया संक्रमण

येँ – नेपाःया थीथी जिल्लाय् थप ६म्हेसित कोरोनाया संक्रमण जूगु दु । स्वास्थ्य तथा जनसंख्या मन्त्रालयं अछामया १म्ह, बर्दियाया ३म्ह, पर्साया १म्ह व कलैयाय् च्वनाच्वम्ह येँया १म्हेसित संक्रमण जूगु पुष्टि जूगु दु ।

सेती अस्पतालया प्रयोगशालाय् याःगु परीक्षणय् अछाम मेलेख गाँउपालिकाया ३२दँया मिजं, भेरी अस्पतालया प्रयोगशालाय् याःगु परीक्षणय् बर्दिया गुलेरिया–१०या २२, २४दँया मिजंत व गुलरिया–२या व १८दँया मिजंयात संक्रमण जूगु खँ मन्त्रालयया प्रवक्ता डा. विकास देवकोटां धयादिल ।

अथेहे नारायणी अस्पतालय् याःगु परीक्षणय् पर्सा जिरा भवनी गाँउपालिका–४या १८दँया मिजं व येँ वडा नम्बर १५ जुया कलैया बाराय् दुम्ह २८दँया मिजंयात कोरोनाया संक्रमण जूगु दु ।

थ्व नापं नेपालय् कोरोनाय संक्रमण जूपिनि ल्याः ६ सय ८२म्ह थ्यंगु दु । उकी मध्ये ६ सय २म्ह मिजंत खःसा ८०म्ह मिसात खः ।