महानगरपाखें कोभिड विशेष अस्पताल व आइसोलेसनया सेवा स्थगन
येँ – येँ महानगरपालिकां वंगु बैशाख–जेठपाखे कोरोना संक्रमण अत्याधिक मात्राय् अप्वयेवं संचालनय् हःगु थनया छत्रपातिइ च्वंगु छत्रपाति कोभिड विशेष अस्पताल व न्यतय् च्वंगु नरदेवी आइसोलेसन सेन्टरया सेवा तत्काललया निंतिं स्थगित यायेगु निर्णय याःगु दु ।
येँ महानगरपालिकाया प्रमुख विद्यासुन्दर शाक्यया अध्यक्षताय् आः नकतिनि च्वंगु कार्यपालिकाया ६७ क्वःगु बैठकं छत्रपाति कोभिड विशेष अस्पताल व न्यतया आयुर्वेदिक अस्पतालय् संचालन यानातःगु आइसोलेसन सेन्टरया सेवा आःयात स्थगित यायेगु निर्णय याःगु खः । कार्यपालिकाया बैठकं कोरोना संक्रमण रोकथाम व नियन्त्रणया निंतिं येँ महानगरं न्ह्याकूगु थीथी ज्याझ्वः सम्बन्धी सहलह यायेगु झ्वलय् उकथंया निर्णय याःगु खः ।
येँ महानगर प्रमुख शाक्यं बैठकं याःगु निर्णय बारे जानकारी बियादिसें वंगु साउन १ गतेनिसें न्यतया आयुर्वेद अस्पतालय् संचालन जुयाच्वंगु सेन्टरय् विरामीभर्ना कायेगु बन्द जुइधुंकूगु खँ कनादिल ।
‘साउन १ गतेनिसें आयुर्वेद चिकित्सालयया एचडीयुसहितया सेन्टरय् विरामी भर्ना कायेगु ज्या मजुइधुंकूगु दु’ महानगर प्रमुख शाक्यं धयादिल, ‘थ्व हे कारणं आः साउनया लिपांगु वालंनिसें छत्रपाति कोभिड विशेष अस्पतालया सेवा नं स्थगन यायेगु निर्णय जूगु दु ।’
‘थौंकन्हय् अस्पतालय् हे विरामीतय्सं सहज रुपं उपचार सेवा काये फयाच्वंगु व आइसोलेसनय् भर्ना जुइपिं विरामीया ल्याः नं म्हो जुयाच्वंगु दु । उकिं स्थगन यायेगु निर्णय यानागु खःसां कन्हय् गुगुं नं इलय् आवश्यक जुल धाःसा सेवाया निंतिं हाकनं निरन्तरता बीगु जुइ’ महानगर प्रमुख शाक्यं धयादिल ।
‘सेवा बन्द हे थ्यंक यानागु मखु, स्थगन जक यानागु खः, आवश्यक जुइगु इलय् थुकियात हाकनं संचालनय हये फइ, संचालनय् हयेगु नं जुइ’ वय्कलं धयादिल ।
नेपालय् कोरोना भाइरसया निगूगु लहरया संक्रमण तच्वया वनेवं उकिया नियन्त्रण व रोकथामया निंतिं निगुलिं अस्पतालं महानगरलिसे सम्झौता यानाः कोभिड विशेष अस्पताल व आइसोलेसन सेन्टर संचालनय् हःगु खः । महानगरलिसे सम्झौता यानाः कोभिडया विरामीया निंतिं उपकरण व मेमेगु हलंज्वलं न्यायेगु सरकारी व सामुदायिक अस्पतालया बिलकथंया भुक्तान जूगु ध्यबायात नं बैठकं अनुमोदन याःगु दुसा भुक्तानी जुइल्यं दुगु ध्यबा नं उपलब्ध याकेगु निर्णय याःगु दु ।
LEAVE YOUR COMMENTS