प्राधिकरणया ल्वहं हिति मालेत ज्ञापन

येँ (नेपालभाषा टाइम्स)÷विद्युत प्राधिकरणया येँय् च्वंगु केन्द्रीय कार्यालय लागा दुने ल्हानाच्वंगु ल्वहं हिति मालेत आः अन गाः म्हुइगु जूगु दु । थनया तिंख्यः लिउने पुलांगु बस पार्क नापसं च्वंगु प्राधिकरणया कम्पाउण्ड दुने पुलांगु ल्वहं हिति ल्हानाच्वंगु दु धइगु प्रमाण लुया वयेवं सम्पदा अभियन्तातय्सं अन म्हुइगु लागिं कुतः शुरु याःगु खः ।

थ्व झ्वलय् म्हिगः बागमती प्रदेश प्रदेशया संस्कृति तथा पर्यटन मन्त्री दीपेन्द्र श्रेष्ठ सहितया छगू पुचः पुरातत्व विभागय् वनाः ल्वहं हिति पिकायेत ज्ञापनपौ बिउगु खः । सम्पदा संरक्षण महाअभियानया नेतृत्वय् वंगु उगु पुचलं पुरातत्व विभागया महानिर्देशक दामोदर गौतमयात उगु ज्ञापनपौ लःल्हाःगु खः । ज्ञापनपौ लःल्हाना कासें महानिर्देशक गौतमं ल्वहं हिति मालेया लागिं विद्युत प्राधिकरणयात धयाः असार महिना क्वचायेवं हे गाः म्हुइत पहल यायेगु बचं बियादिल ।

अथे हे पुचलय् दुथ्याःम्ह बागमति प्रदेशया संस्कृति मन्त्री श्रेष्ठं अन ल्वहं हिति मालेगु लागिं बजेटया अभाव जूसा बागमति प्रदेश सरकारपाखें उपलब्ध याकेगु बचं बियादिल ।

ज्याझ्वलय् सम्पदा संरक्षण महा– अभियानया संयोजक यादवलाल कायस्थं नेवाः भासं च्वयातःगु ज्ञापन पौ महानिर्देशक गौतमयात लःल्हानादीगु खः । प्रतिनिधि मण्डलय् अभियानया आपालं दुजःपिनि सहभागिता दुगु खः ।

उगु थासय् ल्वहंहिति दुगु खँ पिहां वयेवं सम्पदा महाअभियानपाखें विद्युत प्राधिकरणया महानिर्देशक कुलमान घिसिङलिसे नं खँ ल्हायेधुंकूगु व घिसिङं पुरातत्वलिसे समन्वय यानाः अन म्हुइगु ज्या याये धकाः न्हापा हे बचं बियातःगु खँ अभियानया दुजः शैलेश शाक्य बरेजुं कनादिल ।