प्रकाश अमात्य मंत

येँ – वाति लः मुनेगु व सफा चःबिया अभियन्ता प्रकाश अमात्य मंत । वय्कः शुक्रवाः बहनी मदुगु खः । शुक्रवाः न्हिनय् हृदयघात जूम्ह वय्कःयात मेडिसिटी अस्पताल यंकूगु खःसा अन वासः याकुयाकुं बहनी साढे ८ बजे पाखे मदुगु खँ धाःगु दु ।

वय्कः सिथि नखःयात लः दिवस कथं हनेगु अभियान न्ह्याकादीम्ह मध्ये छम्ह खः । अथेहे वाति लःया व्यवस्थापन यायेगु ज्याय् लगे जुयाच्वंम्ह वय्कः थौंकन्हय् अत्याधुनिक सार्वजनिक चःबि व्यवस्थापनया ज्याय् सक्रिय जुया च्वनादीम्ह खः ।

गुथि, इन्फो, एनजिओ फरम लिसें रेडक्रसलिसे आवद्ध अमात्य भाषा ख्यलय् नं सक्रियम्ह खः । वय्कःया जहान व काय छम्ह दी ।