थाइल्याण्डय् नेपाःमि भिक्षुयात निगूगु तहया दर्जा

येँ(नेपालभाषा टाइम्स)-थाइल्याण्डया राजसंस्थां न्हापांखुुुसी नेपाःमि भिक्षु डा. सुगन्ध महास्थविरयात थाई भिक्षु संघया अतिविशिष्ट निगूगु तहया दर्जा बिउगु दु । थाइल्याण्डया राजसंस्था व थाई भिक्षु महासंघं अन हे च्वना बिज्याःम्ह डा. सुगन्ध महास्थविरयात अति विशिष्ट धार्मिक महत्वया राजकीय सम्मान लःल्हाःगु खः ।

थाई राज संस्था व थाई भिक्षु महासंघं वसपोलयात अति विशिष्ट धार्मिक महत्वया निगूगु तहया दर्जा ‘फ्रा ब्रम्हशाक्यवंशविशुद्धी’ पद्वी लःल्हाःगु खः । थुगु पद्वीपाखें सम्मानित जुयाबिज्याःम्ह वसपोल न्हापांम्ह नेपाःमि भिक्षु खः ।

थाई जुजु महा बजिरालोङ्ककर्नपाखें प्रदान याःगु उगु पद्वी लःल्हायेत थाई जुजुया प्रतिनिधिपिं वसपोल च्वनाबिज्याःगु विहारय् वयाः छगू विशेष ज्याझ्वः यासें पद्वी लःल्हाःगु खः । थ्व स्वयां न्ह्यः वसपोल भिक्षु डा. सुगन्ध महास्थविरयात थाई बौद्ध भिक्षु संघया स्वंगूगु तहया दर्जा ‘फ्रा धम्माशाक्यवंशविशुद्धी’ पद्वी बियातःगु खः ।

थाईल्याण्डय् प्यंगू दशक स्वयां अप्वः च्वना बिज्याःम्ह वसपोलं बौद्ध धर्म व बुद्धशासन च्वन्ह्याकेत आपालं योगदान बियाबिज्याःगु दु । भिक्षु डा. सुगन्ध महास्थविर उत्तरी लागाया बौद्ध संघया गर्भनर नं जुयादी । वसपोलं थाई राजसंस्था व थाई जुजुयात बौद्ध धर्म सम्बन्धय् सल्लाह तकं बिया वयाच्वना बिज्याःगु दु ।